शिंदखेड्यात उमेदवारीवरून राष्ट्रवादीच्या बैठकीत पक्षनिरिक्षकासमोर राडा

पक्ष निरीक्षकांसमोरच वाद ; शिंदखेडा मतदार संघासाठी तिघांनी दिल्या मुलाखती

शिंदखेडा : विधानसभा निवडणुकीसाठी राष्टवादी कॉँग्रेसतर्फे बुधवारी इच्छुकांच्या मुलाखती घेण्यात आल्या. या मुलाखती दरम्यान शिंदखेडा मतदार संघातून उमेदवारी मागण्यावरून दोन गटात शाब्दीक वाद उफाळून आला. पक्ष निरीक्षकांसमोरच वाद झाल्याने, तो मिटविण्यासाठी राष्टलवादीच्या पदाधिकार्‍यांना हस्तक्षेप करावा लागला. दरम्यान धुळे शहरातून उमेदवारीसाठी माजी आमदार राजवर्धन कदमबांडे यांचे एकमेव नाव आहे. तर शिंदखेडा मतदार संघासाठी तिघांनी मुलाखती दिल्या.

द्विसदस्यीय समिती धुळ्यात
विधानसभा निवडणुकीसाठी राष्टवादी कॉँग्रेसने यापूर्वीच इच्छुक उमेदवारांकडून ऑनलाइन अर्ज मागविले होते. ज्यांनी अर्ज केले होते, त्यांच्या मुलाखती घेण्यासाठी द्विसदस्यीय समिती गुरुवारी धुळ्यात आली होती. या समितीत प्रदेश कार्यकारिणी सरचिटणीस तथा नंदुरबार जिल्हा प्रभारी उमेश पाटील, धुळे जिल्हा निरीक्षक नाना महाले यांचा समावेश होता. राष्ट्रवादी भवनात शिंदखेडा व धुळे शहर मतदार संघासाठी या मुलाखती घेण्यात आल्या. धुळे शहर मतदार संघातून माजी आमदार राजवर्धन कदमबांडे यांचे एकमेव नाव आहे. तर शिंदखेडा विधानसभा मतदार संघातून माजी आमदार रामकृष्ण पाटील, संदीप बेडसे, व पंचायत समिती सदस्य ललित वारूड इच्छुक आहेत.

शक्तीप्रदर्शनावरूनही वाद
दरम्यान ललित वारूडे यांनी उमेदवाराची इच्छा व्यक्त करताच त्यावर मुडावदचे माजी सरपंच सुनील लांडगे व इतर काही जणांनी जोरदार आक्षेप घेतला. शक्तीप्रदर्शनावरूनही बराच वाद झाला. पक्ष निरीक्षकांसमोरच शाब्दीक वाद सुरू झाल्याने, अखेर पक्षातील इतर पदाधिकार्‍यांना हस्तक्षेप करून या वादावर पडदा टाकावा लागला. यानंतर पक्ष निरीक्षक उमेश पाटील यांनी कार्यकर्त्यांना मार्गदर्शन केले. एकोप्याने निवडणुकीला समोरे जाण्याचे आवाहन त्यांनी उपस्थित कार्यकर्त्यांना केले. यावेळी राष्ट्रवादीचे जिल्हाध्यक्ष किरण शिंदे, जिल्हा परिषद सदस्य किरण पाटील, अ‍ॅड. राजेंद्र पाटील, साहेबराव देसाई, कैलास चौधरी, ज्योती पावरा, इरशाद जहागीरदार, कुणाल पवार, सरोज कदम यांच्यासह कार्यकर्ते मोठ्या संख्येने उपस्थित होते.