शिक्षक भरती मुलाखतीचे व्हिडीओ चित्रीकरण बंधनकारक -विनोद तावडे

पुणे : राज्यातील शिक्षकांची भरती गुणवत्तेच्या आधारावर करण्यासाठी राज्य शासनाने ‘पवित्र पोर्टल’ सुरू केले आहे. या पोर्टलमार्फत खाजगी संस्थांच्या अनुदानित शाळांमध्ये रिक्त असलेल्या एका जागेसाठी ५ उमेदवारांची शिफारस केली जाणार आहे. या उमेदवारांची मुलाखत घेऊन त्यापैकी एकाची निवड संस्थाचालकांना करता येणार आहे. शिक्षक भरतीतील गैरप्रकार रोखण्यासाठी या संपूर्ण मुलाखतींचे व्हिडीओ चित्रीकरण करणे त्या संस्थांवर बंधनकारक असणार आहे अशी माहिती शिक्षणमंत्री विनोद तावडे यांनी दिली.

राज्य मुक्त विद्यालय मंडळाच्या प्रवेश प्रक्रियेचा शुभारंभ त्यांच्या हस्ते आज करण्यात आले. त्यावेळी त्यांनी ही माहिती दिली. राज्यातील शिक्षक व प्राध्यापक भरती प्रक्रिया सुरू करण्याची प्रक्रिया सुरू असल्याचे शिक्षण मंत्र्यांनी यावेळी दिली. प्राध्यापक भरती तातडीने व्हावी यासाठी विद्यापीठस्तरावरून पाठवली जाणारे ३०० पॅनल तयार ठेवण्याच्या सुचना विद्यापीठांना देण्यात आली आहे.

राज्यातील स्थानिक स्वराज्य संस्थांबरोबरच अनुदानित खाजगी शाळा शिक्षकांच्या २० हजार शिक्षकांच्या जागा याव्दारे भरल्या जाणार आहेत. भरतीसाठी महाराष्ट्र राज्य परीक्षा परिषदेमार्फत घेण्यात आलेल्या अभियोग्यता व बुद्धीमापन चाचणीत उत्तीर्ण झालेल्या १ लाख २१ हजार ६१५ उमेदवारांनी पवित्र पोर्टलवर नोंदणी केली आहे. उर्वरित परीक्षा दिलेल्या ४९ हजार ७३३ विद्यार्थ्यांनी पोर्टलवर माहिती भरलेली नाही. यातील १३ हजार ९३ विद्यार्थ्यांच्या पडताळणीची प्रक्रिया पूर्ण न झाल्याने १ लाख ८ हजार ४६४ उमेदवार शिक्षक भरतीसाठी पात्र ठरले आहेत.