शिक्षणमंत्री तावडेंनी दत्तक घेतलेल्या शाळेची दुरावस्था

उस्मानाबाद : राज्यभरात कालपासून शाळा सुरू झाल्या असून प्रत्येक शाळेने शाळेचे स्वागत खूप वेगवगळ्या पद्धतीने केले. त्यामुळे मुलांचा आपल्या शाळेचा पहिला दिवस वर्षभर लक्षात राहणार आहे. पहिल्याच दिवशी मुलांच्या आनंदाला पारावार नव्हता. असे असताना उस्मानाबादमध्ये मात्र, घुगीच्या मुलांची मोठी गैरसोय झालेली दिसली.

घुगी गावातल्या सरकारी शाळेत पहिली ते आठवी पर्यंतचे वर्ग आहेत. राज्याचे शिक्षणमंत्री विनोद तावडे यांनी दत्तक घेतलेली ही शाळा आहे. इथे ना बसायला नीट खुर्च्या नाहीत. डोक्यावर छत नाही चक्क पत्र्यांच्या खोलीत शाळा भरते. दोन वर्षापूर्वी झालेल्या वादळात शाळेचं मोठं नुकसान झालं. त्यावेळी शिक्षणमंत्री विनोद तावडे यांनी शाळेची पाहणी केली. तात्काळ एक कोटींचा निधी मंजूर केला. दोन वर्षे उलटली. मात्र शाळेच्या इमारतीची एक वीटही रचली नाही.

शिक्षणमंत्र्यांना वारंवार आठवण करुनही प्रतिसाद मिळाला नाही. अखेर गावकर्‍यांनी पै-पै जमा केली आणि पत्र्याचे शेड उभारले. उन्हाळ्यात तर चक्क गोठ्यात शाळा भरवण्याची वेळ गावकर्‍यांवर आली होती. सध्या या शाळेत 128 विद्यार्थी शिक्षण घेत आहेत. सात वर्गांसाठी सध्या चार पत्र्याचे शेड आहेत. त्यातल्या एका शेडमध्ये किचन आहे. त्यातच वर्गही भरवावा लागतो. सारे शिकूया पुढे जाऊया असा नारा मायबाप सरकार देतं. मात्र प्राथमिक शिक्षणाच्या मूलभूत सोई-सुविधाही मिळत नसतील तर हे चिंताजनक आहे. किमान शिक्षणमंत्री विनोद तावडेंनी यात लक्ष घालून शाळेचं बांधकाम पूर्ण करावं म्हणजे झालं.