शिरसोली रस्त्यावरील हॉटेलचालकाला सहा जणांकडून बेदम मारहाण

रात्री उशीरा जेवण न दिल्याचा राग ; एमआयडीसी पोलीस ठाण्यात गुन्हा

जळगाव :- शहरात शिरसोली रोडवरील हॉटेल एमएच-19’ या हॉटेल चालकाला मद्यधुंद अवस्थेतील सहा जणांनी लोखंडी रॉड, काठ्यांनी बेदम मारहाण करुन हॉटेलची तोडफोड केल्याची घटना शुक्रवारी रात्रीच्या सुमारास घडली. मारहाणीत जखमीवर जिल्हा रुग्णालयात उपचार सुरु आहे. याप्रकरणी एमआयडीसी पोलिसांत गुन्ह्याची नोंद करण्यात आली आहे.

जळगाव-पाचोरा रोडवर दिनेश सिताराम माळी (वय-42,रा.शिरसोली) यांनी बंद पडलेली हॉटेल चंद्रमा भाड्याने घेवुन एमएच-19’ नावाने नवे हॉटेल सुरु केले आहे. शुक्रवारी रात्री जळगाव शहरातील कंजरवाडा येथील रहिवासी कालू व त्याचा मित्र सोनू कंजर असे दोघे त्याच्या अनोळखी चार मित्रांना घेवुन जेवणासाठी आले होते. मात्र दिनेश माळी यांनी त्यांना जेवण नाही असे सांगून परत जाण्यास सांगीतले. सर्वांनी तेथून निघून जात वेगळ्या हॉटेल मध्ये जावून यथेच्छ मद्यप्राशन केले व जेवण आटोपल्यावर हॉटेलवर येवून आम्हाला जेवण का दिले नाही असे म्हणत दिनेश माळी व नितीन अशोक नानपुरे अशा दोघांना लोखंडी रॉड, काठ्यांनी मारहाण करुन हॉटेलची तोडफोड करण्यात आली आहे. दिनेश माळी यांनी दिलेल्या तक्रारीवरुन एमआयडीसी पोलिस ठाण्यात गुन्ह्याची नोंद करण्यात आली आहे.

बॉम्बे हॉटेलजवळील क्लबवरही दांगडो
शहरातील रेल्वे स्टेशन परिसरातील बॉम्बे हॉटेल परिसरात असलेल्या गल्लीतील एका क्लबवर मद्यधुंद अवस्थेत आठ ते दहा जणांनी गोंधळ घातला. तसेच तोडफोड केल्याची माहिती सूत्रांकडून मिळाली आहे. याप्रकरणी मात्र कुठलीही नोंद अथवा गुन्हा शहर पोलीस ठाण्यात दाखल नाही.