शिरूरमध्ये लवकरच पासपोर्ट सेवा केंद्र – खासदार आढळराव पाटील

परराष्ट्र मंत्रालयाकडून हिरवा कंदील 

शिरूर : पुणे जिल्ह्याची व्याप्ती तसेच परदेशात जाणार्‍या पर्यटकांची संख्या वाढत असून, पर्यटकांच्या सोयीसाठी शिरूर येथे आगामी दीड ते दोन महिन्यांत पासपोर्ट सेवा केंद्र सुरू होणार असल्याची माहिती खासदार शिवाजीराव आढळराव-पाटील यांनी पत्रकार परिषदेत दिली. याबाबत परराष्ट्र मंत्रालयाकडे वर्षभरापूर्वी मागणी केली असल्याचे त्यांनी सांगितले.

पोस्ट कार्यालयातच स्वतंत्र कक्ष

पुणे जिल्ह्यात मोठ्या प्रमाणावर औद्योगिकीकरण वाढतानाचे चित्र असून, त्यातून विकसीत होत असलेल्या आर्थिक स्थितीमुळे तसेच एकूणच मध्यमवर्गीयांचा परदेशात पर्यटनाला जाण्याकडे कल वाढला आहे. शिरूरसह खेड, आंबेगाव तसेच नगर जिल्ह्यातील श्रीगोंदा, पारनेर या तालुक्यांतून दररोज साधारणत: तीन हजार पासपोर्ट वितरीत होतात. एवढ्या मोठ्या प्रमाणावर वितरीत होणार्‍या पासपोर्टची संख्या पाहता, मतदारसंघासाठी पासपोर्ट सेवा केंद्र सुरू करण्याच्या मागणीसाठी एक जानेवारीला परराष्ट्रमंत्री सुषमा स्वराज यांची भेट घेतली होती. यासाठी पाठपुरावा केला. या संदर्भात परवा झालेल्या बैठकीत सचिव ज्ञानेश्‍वर मुळे यांनी ही बातमी दिल्याचे आढळराव यांनी सांगितले. दीड महिन्यात येथील पोस्ट कार्यालयातच स्वतंत्र कक्ष निर्माण करून पासपोर्ट सेवा केंद्र सुरू होणार असल्याचे ते म्हणाले.

केवळ भूसंपादनाचा अडथळा

शिरूर ते पुणे या रस्त्याला एनएच-753 एफ असा नंबर पडला असून, अंदाजे दोन हजार कोटी रुपयांच्या या प्रकल्पाचे डीपीआरचे काम देण्यात आले आहे. येत्या दोन ते तीन महिन्यांत या रस्त्याचे डीपीआरचे काम पूर्ण होणार असल्याचे सांगून आढळराव म्हणाले, की केंद्रीय रस्ते वाहतूकमंत्री नितीन गडकरी यांनी मंजुरीसाठी तयारी दर्शविली आहे. केवळ भूसंपादनाचा अडथळा असून या अडथळ्याच्या शर्यतीतून बाहेर पडल्यावर काम करण्यास निधीची काहीच अडचण येणार नसल्याचे ते म्हणाले.

स्त्याच्या भूमिसंपादनाची प्रक्रिया सुरू

शिरूरच्या दृष्टीने महत्त्वाच्या असणार्‍या चौफुला, म्हावरे तळेगाव ढमढेरे, शिक्रापूर, चाकण ते तळेगाव ढमढेरे या रस्त्यासंदर्भात तळेगाव दाभाडे, चाकण, शिक्रापूर या पहिल्या टप्प्याचा डीपीआर पूर्ण झाला असून तो नॅशनल हायवे अ‍ॅथॉरिटीकडे पाठविण्यात आला आहे. दुसर्‍या टप्प्यात शिक्रापूर, तळेगाव ढमढेरे, न्हावरे ते चौफुला रस्त्याचे भूमिसंपादनाची प्रक्रिया सुरू झाली आहे. शिक्रापूरला काही ठिकाणी भूसंपादनाला होत असलेल्या विरोधाची समस्या नॅशनल हायवे व स्थानिकांनी मिळून सोडविल्यास निधीची अडचणच नसल्याचे आढळराव म्हणाले. नाशिकफाटा ते चाकण, खेड सहापदरीसाठी मंजुरी मिळाली असून, एप्रिलमध्ये ते काम सुरू होईल. भूसंपादन व बांधकाम मिळून हा दोन हजार कोटी रुपयांचा प्रकल्प असल्याचे आढळराव यांनी सांगितले.

सर्वाधिक प्रश्‍न विचारणारा खासदार

माझ्यामुळे एसईझेड, विमानतळ, रेल्वे प्रकल्प गेल्याचा आरोप होतो. मी इतका पॉवरफुल आहे, तर हे प्रकल्प इथे राहण्यासाठी तुमची काहीच ताकद नव्हती का? असे आढळराव अजित पवार व दिलीप वळसे-पाटील यांना उद्देशून म्हणाले. विमानतळ यांच्यामुळे गेल्याचा टोलाही लगावला. मला पराभूत करण्यासाठी जीवतोड प्रयत्न करणार्‍या राष्ट्रवादीने कोणताही उमेदवार द्यावा, असे आव्हान आढळराव यांनी दिले. 545 खासदारांमध्ये सर्वाधिक प्रश्‍न विचारणारा खासदार म्हणून माझा नंबर आला असून, 1100च्या वर प्रश्‍न आपण विचारल्याचे आढळराव यांनी सांगितले.