शिवसेनेचे नगरसेवक बंटी जोशी यांचे मनपात आत्मक्लेश आंदोलन

स्वच्छतेचे तीन-तेरा; ठिकठिकाणी कचराकुंड्या ओव्हर फ्लो ; प्रश्न सुटेपर्यंत आंदोलनावर ठाम

जळगाव: गेल्या दहा दिवसांपासून सफाई मक्तेदाराने कामबंद केल्यामुळे शहरात कचराकोंडी झाली आहे. ठिकठिकाणी अस्वच्छता पसरली असून कचराकुंड्या देखील ओव्हरफ्लो झाल्या आहेत.मनपाचे कायम सफाई कर्मचारी देखील विशिष्ट प्रभागांमध्येच सफाई करीत असल्याचे चित्र स्पष्टपणे दिसून येत आहे. वारंवार सांगूनही स्वच्छता होत नसल्याने शिवसेनेचे नगरसेवक बंटी जोशी यांनी मनपाच्या आठव्या मजल्यावर असलेल्या आरोग्य विभागात आत्मक्लेश आंदोलन केले. प्रशासन नगरसेवकांचे ऐकत नसतील तर सर्वसामान्यांचे काय? असा सवाल देखील उपस्थित होत आहे.

शहरात कचराकोंडी

मनपाने शहरातील साफसफाई आणि कचरा संकलनासाठी वॉटरग्रेस कंपनीला एकमुस्त मक्ता दिला आहे. मात्र पगारासाठी गेल्या दहा दिवसांपासून सफाई व कचरासंकलनाचे काम बंद केले आहे. त्यामुळे स्वच्छतेचे तीन-तेरा वाजले आहे. शहरात सर्वत्र स्वच्छतेची विदारक परिस्थिती झाली आहे. ठिकठिकाणी कचरा साचला असून कचराकुंड्या देखील ओव्हरफ्लो झाल्या आहेत. नागरिक स्वच्छेसाठी नगरसेवकांना वेठीस धरत आहेत. तरीही प्रशासन दुर्लक्ष करीत आहे. शहरात अस्वच्छता असून नागरिकांकडून प्रशासनावर नाराजी व्यक्त होवू लागली आहे. त्यामुळे शहरातील स्वच्छतेकडे लक्ष वेधण्यासाठी शिवसेनेचे नगरसेवक बंटी जोशी यांनी मनपात आत्मक्लेश आंदोलनाचा पवित्रा घेतला आहे. त्यानुसार त्यांनी आंदोलन सुरु केले आहे.

स्वच्छतेची ऐशीतैशी

शहरात स्वच्छतेची ऐशीतैशी झाली आहे. प्रशासनाच्या गलथान कारभारामुळे ही परिसिथिती ओढावली आहे. प्रशासनाचे भोंगळ कारभार चव्हाट्यावर आणण्यासाठी आणि स्वच्छतेचा प्रश्न जोपर्यंत सुटत नाही तोपर्यंत दररोज आंदोलन करणार असल्याचे नगरसेवक बंटी जोशी यांनी पत्रकारांशी बोलतांना सांगितले.

अधिकार्‍यांची तारांबळ

शहरातील स्वच्छतेकडे लक्ष वेधण्यासाठी शिवसनेचे नगरसेवक बंटी जोशी हे मनपाच्या आठव्या मजल्यावरील आरोग्य विभागात आल्यानंतर त्यांनी कार्यालयाच्या बाहेर बसून आत्मक्लेश आंदोलन सुरु केले. नगरसेवकच आंदोलन करीत असल्याने उपायुक्त मिनिनाथ दंडवते आणि आरोग्य अधिकारी डॉ.विकास पाटील यांची चांगलीच तारांबळ उडाली. यावेळी अधिकार्‍यांनी नगरसेवक जोशी यांना आंदोलन मागे घेण्याची विनंती केली.मात्र बंटी जोशी यांनी आंदोलनाच्या भूमिकेवर ठाम राहिले. सकाळी 10.30 वाजेपासून ते दुपारी 2.30 वाजेपर्यंत बंटी जोशी यांनी आंदोलन केले.