शिष्यवृत्तीसाठी विद्यार्थ्यांना पुन्हा भरावे लागणार ऑनलाईन अर्ज!

पुणे । शासनाचे महाडीबीटी पोर्टल कुचकामी निघाल्यामुळे व्यावसाईक अभ्यासक्रमाच्या विद्यार्थ्यांकडून तंत्रशिक्षण संचालनालयने पुन्हा ऑनलाईन शिष्यवृत्ती अर्ज करण्याच्या सुचना दिल्या आहेत. दुसर्‍यांदा अर्ज करण्याची वेळ आल्यामुळे विद्यार्थ्यंना मनस्ताप सहन करावा लागत आहे. महाडीबीटी प्रणालीतील अडचणीमुळे मात्र विद्यार्थ्यांना शिष्यवृत्ती अर्जासाठी पुन्हा पळापळ करावी लागणार आहे.

पोर्टलवरून योजना वगळली
अखेर तंत्रशिक्षण संचालनालयने ह्या पोर्टलवरून या दोन्ही योजना वगळण्याचा निर्णय निर्णय घेतला. त्यानुसार परत एकदा आता विद्यार्थ्यांना शिष्यवृत्तीसाठी अर्ज करण्याचे सूचित केले आहे. यासंबंधीची माहिती संस्थेने दर्शनी भागातील सूचना फलकावर कायमस्वरुपी लावावी. तसेच पात्र विद्यार्थ्यांपैकी एकही पात्र लाभार्थी विद्यार्थी या योजनांच्या लाभापासून वंचित राहणार नाही, याची दक्षता संस्थांनी घ्यावी, असेही तंत्रशिक्षण संचालनालयने स्पष्ट केले.

व्यावसाईक अभयसक्रमाच्या पात्र विद्यार्थ्यांना तंत्रनिकेतनच्या संकेतस्थळावरून 3 मार्च अखेर ऑनलाईन अर्ज करावे लागणार आहे. ज्यांनी यापूर्वी ‘महाडीबीटी’ पोर्टलवर अर्ज केले आहेत, अशा विद्यार्थ्यांनी शिष्यवृत्तीसाठी ऑनलाईन अर्ज करावेत, असे तंत्रशिक्षण संचालक डॉ. अभय वाघ यांनी सांगितले.

तांत्रीक अडचणीमुळे शिष्यवृत्तीचा लाभ नाही
व्यावसायिक अभ्यासक्रमास प्रवेश घेणार्‍या पात्र विद्यार्थ्यांना राजर्षी छत्रपती शाहू महाराज शिक्षण शुल्क शिष्यवृत्ती योजना (ईबीसी) आणि डॉ. पंजाबराव देशमुख वसतिगृह निर्वाह भत्ता योजने अंतर्गत शिष्यवृत्ती दिली जाते. ज्या विद्यार्थ्यांचे कुटुंबाचे वार्षिक उत्पन्न सहा लाखांपर्यंत आहे, अशा विद्यार्थ्यांना शैक्षणिक व परीक्षा शुल्कांच्या 50 टक्के शिष्यवृत्ती ईबीसीद्वारे देण्यात येते. तर निर्वाह भत्ता योजना अल्पभूधारक शेतकरी व मजूर पाल्यांना प्रतिमहा 3 हजार रुपये दहा महिन्यांसाठी दिला जातो.या दोन्ही योजनेसाठी पहिल्यांदाच महाडीबीटी’ पोर्टल राज्य शासनाने कार्यान्वित केले. त्यानुसार यावर्षी अर्थात 2017-18 या शैक्षणिक वर्षात प्रवेश घेतलेल्या विद्यार्थ्यांकडून अर्ज मागविले. मात्र पोर्टलवर अर्ज करताना अनेक तांत्रिक अडचणींना सामोरे जावे लागले. काही विद्यार्थ्याना अर्जच करता आले नाही. त्याचा परिणाम म्हणून अद्यापपर्यंत एकाही विद्यार्थ्यांना या दोन्ही योजनेची शिष्यवृत्ती मिळाली नाही.