श्रीकांत देशमुखांना साहित्य अकादमी पुरस्कार

नवी दिल्ली : वृत्तसंस्था प्रसिद्ध मराठी कवी श्रीकांत देशमुख यांच्या ‘बोलावे ते आम्ही’ या काव्यसंग्रहाला 2017चा साहित्य अकादमी पुरस्कार जाहीर झाला आहे. दिल्लीतील रवींद्र भवनातील साहित्य अकादमीच्या मुख्यालयात गुरुवारी साहित्य अकादमीच्या वार्षिक पुरस्कारांची घोषणा करण्यात आली. देशातील 24 प्रादेशिक भाषांतील विविध साहित्य प्रकारात सर्वोत्कृष्ट पुस्तकांची घोषणाही यावेळी करण्यात आली.

1 लाख रूपये, ताम्रपत्र, शाल
प्रसिद्ध मराठी कवी श्रीकांत देशमुख यांच्या बोलावे ते आम्ही या काव्यसंग्रहास वर्ष 2017 चा साहित्य अकादमी पुरस्कार गुरूवारी जाहीर झाला. 1 लाख रूपये रोख, ताम्रपत्र आणि शाल असे या पुरस्काराचे स्वरूप असून, 12 फेब्रुवारी 2018 रोजी पुरस्कारांचे वितरण होणार आहे.

सुजाता देशमुखांना अनुवाद पुरस्कार
सुजाता देशमुख यांना अनुवादासाठी साहित्य अकादमी पुरस्कार जाहीर झाला आहे. सुजाता देशमुख अनुवादित गौहर जान म्हणतात मला या पुस्तकास उत्कृष्ट अनुवादाच्या पुरस्कार जाहीर झाला आहे. माय नेम इज गौहर जान या विक्रम संपथ लिखित इंग्रजी पुस्तकाचा अनुवाद त्यांनी केला आहे. 50 हजार रुपये रोख, ताम्रपट असे पुरस्काराचे स्वरूप आहे.

7 कादंबर्‍यांनाही पुरस्कार
एकूण 24 भाषांमध्ये 7 कादंबर्‍या, 5 काव्यसंग्रह, 5 लघू कथा, 5 समीक्षात्मक पुस्तके तर 1 नाटक आणि 1 निबंध या पुस्तकांची यंदाच्या साहित्य अकादमी पुरस्कारांमध्ये वर्णी लागली आहे. साहित्य अकादमीच्या मराठी साहित्यातील पुस्तक निवड समितीमध्ये प्रसिध्द साहित्यिक संजय पवार, पुष्पा भावे आणि सदानंद मोरे यांचा समावेश होता.