संत पीठाच्या निविदा प्रक्रियेची चौकशी करावी – दत्ता साने

पिंपरी : पिंपरी-चिंचवड महापालिकेच्यावतीने चिखली परिसरामध्ये संतपीठाचे निर्माण करण्यात येणार आहे. नुकतीच महापालिकेच्या झालेल्या बैठकीमध्ये ही निविदा प्रक्रीया राबविण्यास सुरूवात झाली आहे. मात्र या निविदेत ठरावीक ठेकेदारांनीच सहभाग घेतल्याचे दिसून येत आहे. त्यामुळे या निविदा प्रक्रियेत रिंग झाल्याचा संशय आहे. त्यामुळे या निविदा प्रक्रीयेची सखोल चौकशी करण्यात यावी. निविदा प्रक्रीयेतील संबंधित दोषी अधिकार्‍यांवर कारवाई करावी, अशी मागणी विरोधी पक्षनेते दत्ता साने यांनी केली आहे. चौकशी पुर्ण होईपर्यंत निविदा प्रक्रीया थांबविण्यात यावी. अन्यथा न्यायालयात धाव घेतली जाईल, असा इशाराही त्यांनी दिला आहे.

याबाबत महापालिका आयुक्त श्रावण हर्डीकर यांना निवेदन देण्यात आले आहे. या निवेदनामध्ये दत्ता साने यांनी म्हटले आहे की, महापालिकेच्या चिखलीमधील प्रभाग क्रमांकमध्ये संतपीठ निर्माण करण्यात येत आहे. त्यमुळे या संत पीठासाठी महापालिकेच्यावतीने निविदा भरण्यासाठी ठेकेदारांना सांगण्यात आले होते. महापालिकेने 40 कोटी रुपयांचा खर्च गृहित धरला आहे. मात्र, कंत्राटदारांनी जादा दराच्या निविदा भरल्या असून त्यामुळे 40 कोटींच्या कामाला आता पंचेचाळीस कोटी रुपये मोजावे लागणार आहेत. एक चिखलीमधील संतपीठ बांधण्याच्या कामांच्या निविदा उघडण्यात आल्या आहेत. या निविदेचे अवलोकन केले असता, ठराविक ठेकेदारांनीच निविदा भरल्या असल्यचे दिसून आहे आहे. त्यामुळे या निविदेमध्ये रिंग झाल्याचा सशंय आहे. त्यामुळे निविदा भरल्याची माहिती देण्यात यावी.

भाजप पदाधिकारी व अधिकार्‍यांच्या या अर्थपूर्ण मिलीभगतमुळे महापालिकेचे लाखो रुपयांचे नुकसान होत असून, नागरीकांच्या कररुपी पैश्यांची उधळपट्टी होत आहे. या प्रकरणातून भाजप पदाधिकार्‍यांचा पारदर्शक कारभार उघड झाला आहे. या निविदेमध्येही ‘रिंग’ झाल्याचा संशय निर्माण होत आहे. त्यामुळे या निविदा प्रक्रीयेची सखोल चौकशी करण्यात यावी. निविदा प्रक्रीयेतील संबंधित दोषी अधिकार्‍यांवर कारवाई करण्यात यावी. तोपर्यंत निविदा प्रक्रीया थांबविण्यात यावी. अन्यथा न्यायालयात धाव घेतली जाईल, असा इशारा साने यांनी निवेदनातून दिला आहे