संत मुक्ताई निघाली पंढरीच्या विठ्ठल भेटीला; वारकरी विठ्ठल नामात मंत्रमुग्ध

जळगाव । नगरीचे ग्रामदैवत श्रीराम मंदिर संस्थान संचलित श्री संत मुक्ताबाई राम पालखी बुधवारी रात्री अप्पा महाराज समाधी येथे मुक्कामास होती. पालखीचे नेतृत्व मंगेश महाराज जोशी यांनी केले. श्री क्षेत्र पंढरपुर येथे आषाढी यात्रेकरीता सालाबादाप्रमाणे यंदाही जळगाव येथून येत्या 8 जून गुरुवार रोजी श्री क्षेत्र पंढरपूर येथे येथे प्रयाण केले. मेहरूण परिसरातील संत मुक्ताई चरण पादुकांचे मंदिरात भजन आरतीच्या गजरात पूजन करण्यात आले. यावेळी नागरिकांनी मुक्ताई चरणाचा आशीर्वाद घेण्यासाठी गर्दी केली होती.

झेंडूजी महाराज संस्थानतर्फे 9 जून रोजी पालखी
खान्देशातील झेंडूजी महाराज बेळीकर गुरुपरंपरेची 185 वर्षाची परंपरेची दिंडी 9 जून रोजी श्री.क्षेत्र कुंडलेश्‍वर येथून प्रस्तान होणार आहे. भाविक वारकर्‍यांनी पायी दिंडीत सहभागी व्हावे, असे आवाहन ह.भ.प.गुरुवर्य मठाधीपती राजाराम शास्त्री महाराज यांनी केले आहे. दिंडीत ह.भ.प. रमेश धांडे महाराज, ह.भ.प.भरत महाराज(नशिराबाद), गुरुवर्य राजाराम शास्त्री महाराज, ह.भ.प.प्रशांत महाराज, ह.भ.प.वासुदेव महाराज बर्‍हाटे तसेच चोपदार रामभाऊ पाटील, हालकरी सुधाकर महाराज हे राहणार आहे.

वारकरी संप्रदाय सहभागी
मेहरूण गाव शिवारात संत मुक्ताईपादुका मंदिराचे जैन इरिगेशनचे अध्यक्ष अशोक जैन यांच्या हस्ते पूजन करण्यात आले. श्रीराम मंदिर संस्थानचे प्रमुख विश्वस्त ह.भ.प मंगेश महाराज जोशी यांच्या सह विश्वस्त मंडळी पालखी सोहळ्यात उपस्थित होते.यामध्ये नंदू शुक्ल,अरुण धर्माधिकारी,कारभारी गव्हाणे, पोपट महाजन, जीतेद्र वारके, सखाराम वाघ, अनिल कोळी, केशव बारी, सुनील भंडारी, चंदू कासार , सुनील शिंपी, तुषार न्हावी, सुपडू तेली, दत्तू सुतार, देवेद्रा साखरे, मिलिंद भंडारी, असंख्य वारकरी मंडळी मुक्ताई सेवेत दाखल झाले होते.

मान्यवरांच्या हस्ते होणार पूजन
श्रीराम मंदिर परीसरातील पालखी मार्गातील प्रत्येक नागरीक यावेळी पालखीचे दर्शन घेत होता. हरिनामाच्या जय घोषात भजन करीत वारीकरी विठ्ठल नामात मंत्रमुग्ध झाले. वटपौर्णिमेला सकाळी 8 वाजता पंढरपूर येथे जाणार्या श्रीराम उत्सव मूर्ती व संत मुक्ताईच्या पादुका तसेच संत आप्पा महाराज समाधी स्थळावर जिल्हाधिकारी किशोर राजे निंबाळकर,आमदार सुरेश भोळे,जिल्हापरिषद अध्यक्ष उज्वला पाटील यांच्या हस्ते पूजा अर्चना करण्यात आली. पालखी प्रस्थान करताना कवरराम चौक,पंचमुख हनुमान मंदिर,सिंधी कॉलनी,इच्छादेवी मंदिर,शिरसोली नाका मार्गे श्री क्षेत्र पंढरपूरकडे रवाना झाली. यात हजारो भाविक सहभागी झाले असून विठ्ठलनामात सर्व मंत्रमुग्ध झाले आहे.