संसदीय कारकिर्दीने गाठली पन्नाशी

औरंगाबाद । संसदीय कारकिर्दीस 50 वर्षे पूर्ण झाल्याबद्दल राष्ट्रवादी काँग्रेसचे अध्यक्ष शरद पवार यांचा शनिवार, 29 जुलै रोजी नागरी सत्कार करण्यात येणार आहे. सत्कार सोहळा समितीचे अध्यक्ष नंदकिशोर कागलीवाल, कार्याध्यक्ष आमदार सतीश चव्हाण यांनी पत्रकार परिषदेत ही माहिती दिली. देवगिरी महाविद्यालयाच्या प्रांगणात शनिवारी दुपारी तीन वाजता सत्काराच्या कार्यक्रम होणार. केंद्रीयमंत्री नितीन गडकरी यांच्या हस्ते शरद पवार यांचा नागरी सत्कार होणार आहे. सलग 50 वर्षे राज्याच्या आणि देशाच्या कायदे मंडळात कार्य केलेले शरद पवार हे एकमेव नेते ठरले आहेत. त्यांच्या कार्याची दखल घेऊन केंद्र सरकारने पद्मविभूषण देऊन गौरविले आहे. पाच दशकांत पवार यांच्या कार्यकाळात अनेक निर्णय झाले. प्रकल्प उभे राहिले. यात त्यांनी मराठवाड्याच्या विकासासाठीही पुढाकार घेतला असल्याचे आमदार चव्हाण म्हणाले.