सकारात्मक बदलाचे दूत व्हावे – डॉ. लक्ष्मीकांत देशमुख

सामाजिक कृतज्ञता सन्मान प्रदान सोहळा

पुणे : भोवताली बोलणारी माणसे जास्त आहेत आणि कृतिशीलतेची कमतरता आहे. अशा वातावरणात कृतिशील होऊन सकारात्मक बदलासाठी प्रत्येकाने काम करून सकारात्मक बदलाचे दूत व्हावे, असा संदेश संमेलनाध्यक्ष डॉ. लक्ष्मीकांत देशमुख यांनी विद्यार्थ्यांना आणि सामाजिक कार्यकर्त्यांना दिला.

‘महाराष्ट्र कॉस्मॉपॉलिटन एज्युकेशन सोसायटी’ आणि ‘प्रबोधन माध्यम’ यांच्या वतीने देण्यात येणारे ‘डॉ. पी. ए. इनामदार सामाजिक कृतज्ञता सन्मान 2018’ पुरस्कार डॉ. देशमुख यांच्या हस्ते विविध क्षेत्रातील मान्यवरांना प्रदान करण्यात आला.

विविध पुरस्कारांनी सन्मानीत मान्यवर

शिवकुमार डिगे (माजी धर्मादाय आयुक्त, मुंबई उच्च न्यायालयाचे निबंधक-रजिस्ट्रार), अन्वर राजन (सचिव, महाराष्ट्र गांधी स्मारक निधी, पुणे), डॉ. सुमंत पांडे (कार्यकारी संचालक,जलसाक्षरता केंद्र, यशदा), संजय यादवराव (संस्थापक, कोकण भूमी प्रतिष्ठान, मुंबई), डॉ. जे. बी. गारडे (दंत शल्य चिकित्सक, पुणे) तसेच किशोर धारिया (पश्‍चिम घाटातील पर्यावरणस्नेही पर्यटन), राजेंद्र आवटे (ग्रामीण भागातील उद्योग संधी निर्माण), संजय भंडारी (इलेक्ट्रॉनिक वेस्ट रिसायकलिंग) यांना यावेळी सन्मानित करण्यात आले. महाराष्ट्र कॉस्मॉपॉलिटन एज्युकेशन सोसायटीच्या गुणवंत सहकार्‍यांसाठी असलेल्या डॉ. पी. ए. इनामदार कार्यक्षमता व गुणवत्ता सन्मानाने प्राचार्य डॉ. शैला बूटवाला आणि जुलेखा शेख यांना गौरविण्यात आले.

नेतृत्वाची गरज

महाराष्ट्र कॉस्मोपॉलिटन एज्युकेशन सोसायटीचा परिसर हा व्यवस्थेने नाकारलेल्याना उत्तम शिक्षण देणारा कॅम्पस आहे. डॉ. पी. ए. इनामदार हे सर सय्यद खान यांची शिक्षण परंपरा चालवत आहेत. मुस्लिम मागासांसाठी अजून शिक्षण संस्था आणि डॉ. इनामदार यांच्यासारख्या नेतृत्वाची गरज असल्याचे डॉ. देशमुख यांनी सांगितले. संयोजन समितीचे अध्यक्ष दीपक बीडकर यांनी प्रास्ताविक तर रुमाना शेख यांनी सूत्रसंचालन केले. लतीफ मगदूम यांनी आभार मानले.