….सगळे नाचू लागले अन भूकंप झाला!

मेक्सिको: रविवारी फिफा वर्ल्ड कपमध्ये मेक्सिकोच्या संघाने गतविजेत्या जर्मनीला पराभवाचा धक्का दिला. जर्मनीवर मेक्सिकोने धक्कादायक विजय मिळवल्यावर मेक्सिकोमध्ये चाहत्यांनी एकच जल्लोष केला. मेक्सिकोच्या फुटबॉल संघाच्या चाहत्यांनी असा काही ठेका धरला की मानवनिर्मित भूकंप झाला. भूकंप मापन करणाऱ्या यंत्रणेने याची नोंदही केली. मेक्सिकोच्या संघाने गोल डागताच चाहते नाचू लागले आणि भूकंपाची नोंद झाली.

मेक्सिको विरुद्ध जर्मनी हा सामना पाहण्यासाठी फुटबॉल चाहते मेक्सिको सिटीतील प्रसिद्ध एंजल ऑफ इंडिपेंडन्ट्स स्मारकाजवळ गोळा झाले होते. मेक्सिकोचा झेंडा फडकावत ते गाणी म्हणत होते. सामन्याच्या 35 व्या मिनिटाला स्टार खेळाडू हिरविंग लोजानोने गोल करताच चाहत्यांनी जबरदस्त जल्लोष केला. सर्वच चाहते आनंदाने नाचायला, उड्या मारायला लागले. यावेळी मेक्सिकोत दुपारचे ११ वाजून ३२ मिनिटे झाली होती. मेक्सिकोच्या भूगर्भीय संशोधन संस्थेने यावेळी भूकंपाची नोंद केली. लोजानोनं गोल करताच मेक्सिको सिटीत भूकंपाचा धक्का जाणवला, अशी माहिती भूगर्भीय संशोधन संस्थेने दिली.