सचिनने गाडी थांबवून दुचाकीस्वारांना दिला हेल्मेट घालण्याचा सल्ला

मुंबई । क्रिकेटमधून निवृत्ती घेतल्यानंतर सचिन तेंडुलकर सामाजिक कार्यात रस घेताना दिसत आहे. काही दिवसांपूर्वी सचिन रस्त्यावर लोकांना हेल्मेट घालण्याच सल्ला देताना दिसला होता. सचिन स्वत: लोकांना हेल्मेट घालावं यासाठी आवाहन करत होता. शुक्रवारी पुन्हा एकदा तो अशाच प्रकारे दुचाकीस्वारांना हेल्मेट घालण्यासाठी आवाहन करताना दिसला. सचिनने स्वत: फेसबुक आणि ट्विटरवर व्हिडीओ शेअर केला. ज्यामध्ये त्याने दुचाकीस्वारांशी संवाद साधला. सचिनने व्हिडीओला ‘हेल्मेट डालो 2.0’ असे कॅप्शनही दिले. व्हिडीओमध्ये सचिन आपल्या कारच्या विंडोची काच खाली करुन दुचाकीस्वारांशी बोलताना दिसत होता.

सचिनने याआधीही अशाच प्रकारे लोकांना सुरक्षेसाठी हेल्मेट घालण्याचे आवाहन केले होते. काही दिवसांपूर्वी सचिनने शहरातील वाढत्या वाहतूककोंडीवरुन मुंबई उपनगरचे जिल्हाधिकारी दीपेंद्रसिंह कुशवाहा यांना पत्र लिहिले होते. सचिनने केवळ वाहतूककोंडीवर नाराजी व्यक्त न करता ती सोडवण्यासाठी उपायदेखील सुचविले होते. त्यात जलवाहतुकीचा पर्याय सुचवण्यात आला होते. रस्ते आणि पादचारी पुलांवरील होणारी गर्दी लक्षात घेता स्वतंत्र फेरीवाला क्षेत्र निर्माण करा, असे सचिनने सुचविले होते.

जलवाहतुकीचा पर्याय दिला
मुंबईच्या वाहतूक व्यवस्थेचा मूळ कणा रेल्वेमार्ग आहे. छत्रपती शिवाजी महाराज टर्मिनस येथून जादा लोकल सोडण्याची क्षमता पूर्ण झाल्याने आता अधिक लोकल सोडणे अशक्य असल्याचे रेल्वे अधिकारी खासगीत कबूल करतात. शहरांत ठिकठिकाणी विकासकामे सुरू असल्यामुळे वाहतुकीला अडथळा निर्माण होतो. जलवाहतूक सुरू झाल्यास त्यामुळे प्रदूषणाला आळा बसेल, शिवाय दरदेखील परवडणारे असल्यामुळे सर्वसामान्यांचा चांगला प्रतिसाद लाभेल. यामुळे हाँग काँगच्या धर्तीवर जलवाहतूक सुरू केल्यास फायदा होईल, असे सचिनने जिल्हाधिकारी दीपेंद्रसिंह कुशवाहा यांना पाठवलेल्या पत्रात म्हटले.