सज्जन कुमार यांना जन्मठेप नाही तर फाशीचीच शिक्षा हवी होती-भाजप

नवी दिल्ली-१९८४ च्या शीख विरोधी दंगलीप्रकरणी आज तब्बल ३४ वर्षानंतर दिल्लीच्या उच्च न्यायालयाने निकाल दिला आहे. कॉंग्रेसचे ज्येष्ठ नेते सज्जन कुमार यांना दोषी ठरविण्यात आले असून त्यांना जन्मठेपेची शिक्षा ठोठविण्यात आली आहे. मात्र सज्जन कुमार यांना जन्मठेप नाही तर फाशीचीच शिक्षा द्यायला हवी होती असे भाजपकडून सांगितले जात आहे.

सज्जन कुमार यांना शीख विरोधी दंगली भडकविण्याच्या आरोपाखाली शिक्षा झाली आहे. पाच लाखांचा दंड व जन्मठेप अशी शिक्षा त्यांना देण्यात आली आहे. सज्जन कुमार यांच्यासोबतच माजी आमदार महेंद्र यादव आणि किशन खोखर यांच्या शिक्षेत वाढ करण्यात आली असून १०-१० वर्षांनी शिक्षा वाढविण्यात आली आहे.

कॉंग्रेसने शिख विरोधी दंगल भडकविली. यात अनेकांची हत्या करण्यात आली. याला कॉंग्रेसच जबाबदार आहे. कॉंग्रेसने सज्जन कुमार यांना वाचविण्याचे प्रयत्न केले आहे असे आरोप अर्थमंत्री अरुण जेटली यांनी केले आहे. कॉंग्रेसचे हे पाप आज उघड झाले आहे असे जेटली यांनी सांगितले.