सट्टा जुगार अड्ड्यावर पोलिसांचा छापा
जळगाव । शहरात सट्टाजुगार खेळवितांना चार जणांना पकडण्यात आले. त्यांच्याकडून सुमारे 19 हजाराचे साहित्य जप्त करण्यात आले आहे. याप्रकरणी जिल्हापेठ पोलीसांत सहा जणांवर गुन्हा दाखल करण्यात आला आहे. शहरातील गुजरालाल पेट्रोलपंपाजवळील वाईन शॉप जवळ सट्टा जुगार खेळवित असल्याची माहिती डीवायएसपी सचिन सांगळे यांना मिळाली. त्यांनी पथकातील सपोनि अशोक वानखेडे, सफौ.तुकाराम गंधाले, अनिल पाटील, विजय काळे, रविंद्र मोतीराय, ज्ञानेश्‍वर पाटील यांना बोलावून कारवाईच्या सुचना दिल्या. या पथकाने घटनास्थळी जावून सापळा रचला. यावेळी सट्टा जुगाराच्या साहित्यासह सहा जण मिळून आले. पोलीसांना पाहुन सहापैकी दोघांनी पळ काढला. तर पोलीसांनी गोविंदा लक्ष्मण अंबुरे, शेख अब्दुल शेख रफिक, रविंद्र भास्कर पाटील, शरद नारायण नागरे यांना ताब्यात घेतले. चौघांची चौकशी केली असता शिवाजीनगरमधील शंभु दिलीप भोसले व सिंधी कॉलनीतील श्याम कुकरिया यांच्या सांगण्यावरुन सट्टा जुगार खेळवित असल्याची माहिती पोलीसांना चौघांनी दिली. भोसले व कुकरिया यांच्यासह चौघांवर जिल्हापेठ पोलीस ठाण्यामध्ये गुन्हा दाखल करण्यात आला आहे.