सफाई कर्मचार्‍यांकडे दुर्लक्ष खपवून घेणार नाही
नगरसेवक डोळस यांचा अधिकार्‍यांना इशारा
पिंपरी : शहर स्वच्छ ठेवणार्‍या सफाई कर्मचार्‍यांच्या समस्यांकडे महापालिका दुर्लक्ष करत आहे. त्यांना सुरक्षिततेची साधने दिली जात नाहीत. ड्रेनेजचे काम करणार्‍या कर्मचार्‍यांना अनेकदा मैला हाताने साफ करावा लागतो. यामध्ये कॅव्हेनंजर अ‍ॅक्टचे उल्लंघन होत आहे. या अ‍ॅक्टप्रमाणे मैला हाताने साफ करणे मानवी हक्कांचे उल्लंघन आहे. कंत्राटी आणि महापालिकेच्या सफाई कर्मचार्‍यांच्या प्रश्‍नांकडे आयुक्तांचे दुर्लक्ष होत आहे. आगामी काळात सफाई कर्मचार्‍यांच्या समस्यांकडे दुर्लक्ष केल्यास खपवून घेतले जाणार नाही, असा इशारा स्थायी समितीचे सदस्य विकास डोळस यांनी दिला. कर्मचार्‍यांच्या समस्या तातडीने मार्गी लावण्याची सूचना देखील त्यांनी अधिकार्‍यांना केली. पिंपरी-चिंचवड महापालिकेची स्थायी समितीची साप्ताहिक सभा नुकतीच पार पडली. सभापती ममता गायकवाड सभेच्या अध्यक्षस्थानी होत्या. महापालिकेत काम करणार्‍या अनुसूचित जाती आणि सफाई कर्मचार्‍याच्या समस्यांकडे दुर्लक्ष केल्याप्रकरणी राष्ट्रीय अनुसूचित जाती आयोगाने आयुक्तांना नोटीस बजावली आहे. मात्र, आयुक्तांनी कोणतीच दखल न घेतल्याबाबत येत्या 5 फेब्रुवारी रोजी नवी दिल्ली मुख्यालयात हजर राहण्याचे समन्स राष्ट्रीय अनुसूचित जाती आयोगाच्या सदस्या डॉ.स्वराज विद्वान यांनी जारी केले आहे.
हे देखील वाचा
शहर स्वच्छ ठेवण्यात मोलाचा सहभाग
याबाबत सभेत बोलताना विकास डोळस म्हणाले की, स्वच्छता कर्मचारी हे प्रामाणिकपणे काम करुन शहर स्वच्छ ठेवतात. शहर स्वच्छ व सुंदर ठेवण्यामध्ये त्यांचा मोलाचा सहभाग आहे. सफाई कर्मचारी प्रतिष्ठित नागरीक आहेत. त्यांचे संवैधानिक हक्क त्यांना मिळत नाहीत. महापालिका सफाई कर्मचार्‍यांच्या समस्यांकडे सातत्याने दुर्लक्ष करत आहे. त्यांना सोयी-सुविधा दिल्या जात नाहीत. महापालिकेच्यावतीने सफाई कर्मचार्‍यांना सुरक्षा साधने दिली जात नाहीत. मास्क, हातमोजे, गमबुट, बारा साबण, सहा मोठे हातरुमाल, दरमहा दोन झाडू नियमितपणे दिले जात नसल्याचे निदर्शनास आले आहे. पावसाळा संपल्यावर रेनकोट देण्यात आला आहेत. फवारणीची पावडर, फिनेल, अ‍ॅसिड हे मुबलक प्रमाणात दिले जात नाहीत. अनेकदा आरोग्य निरीक्षक स्वत:च्या पैशाने औषधे आणतो. मैला साफ करण्यासाठी अत्याधुनिक मशिन घ्या. तंत्रज्ञानाचा वापर करावा. सफाई कर्मचार्‍यांच्या सर्व समस्या तातडीने सोडवाव्यात. त्यांना सोयी-सुविधा द्यावात. त्यांच्याकडे दुर्लक्ष केल्यास खपवून घेतले जाणार नाही.