सफाई कर्मचार्‍यांना ‘स्मार्ट वॉच’ नको… ‘स्मार्ट साहित्य’ पुरवा  

पिंपरी चिंचवड : कोट्यावधी रुपये खर्चून स्मार्ट वॉच घेण्याचा प्रस्ताव स्थायी समितीने तहकूब केला. सफाई कर्मचार्‍यांना ‘स्मार्ट वॉच’ नको तर ‘स्मार्ट साहित्य’ पुरवावे. तसेच हा प्रस्ताव तहकूब न करता तो रद्द करावा, अशी मागणी मनसेचे गटनेते सचिन चिखले यांनी महापालिका आयुक्त श्रावण हर्डीकर यांच्याकडे केली आहे. यासंदर्भात सचिन चिखले यांनी आयुक्तांना निवेदन दिले आहे.

निवेदनात म्हटले आहे की, कर्मचार्‍यांवर नियंत्रण ठेवण्यासाठी महापालिकेच्या स्थायी समितीसमोर आयुक्त श्रावण हर्डीकर यांनी स्मार्ट वॉचचा ठराव ठेवला होता. यासाठी दरमहा 286 अधिक जीएसटी प्रमाणे एकूण दरमहा 13 लाख 4 हजार 128 रुपये तर एका वर्षासाठी 1 कोटी 56 लाख 49 हजार 536 रुपये असा एकूण 6 कोटी 285 लाख 98 हजार 144 रुपयांचा खर्च येणार आहे. हा ठाराव स्थायी समितीच्या समोर मांडण्यात आला आहे. दुसर्‍या बाजूला सफाई कामगारांना बूट, हातमोजे दिले गेलेले नाहीत, त्यांना मुलभुत सुविधा नसताना महापालिकेने अशा वॉचवर कोट्यावधी रुपये खर्च करु नयेत, त्यातल्या त्यात थेट पद्धतीने खरेदीसाठी मनसेचा विरोध असून या निविदेचा अभ्यास करण्यासाठी तुर्तास स्थायी समितीने हा प्रस्ताव तहकूब ठेवला आहे. मात्र तो तहकूब न ठेवता सरळ रद्द करावा, असे चिखले यांनी नमूद केले आहे.