समता नगरात गळफास घेऊन महिलेची आत्महत्या

जळगाव । शहरातील समता नगरात महिलेने राहत्या घरात गळफास घेवून आत्महत्या केल्याची घटना मंगळवारी दुपारी 1.30 वाजेच्या सुमारास उघडकीस आली. सरीता हेमराज पवार (वय-30) असे मयत महिलेचे नाव आहे. दरम्यान, महिलेचा मृतदेह सायंकाळी जिल्हा सामान्य रूग्णालयात शवविच्छेदनासाठी दाखल करण्यात आले होते. त्यावेळी नातेवाईकांनी एकच गर्दी केली होती. हेमराज पवार हे समता नगरात पत्नी सरीता, मुलगा रूद्र व मुलगी विधी यांच्यासोबत राहतात.

हेमराज हे पेंन्टर म्हणून काम करतात. मुलांना सुट्ट्या लागल्या असल्यामुळे रूद्र आणि विधी हे चिमुकले अमळनेर येथे मामा कडे गेले आहेत. यातच मंगळवारी हेमराज हे सकाळीच बी.जे.मार्केट येथे कलर घेण्यासाठी घरून निघून गेले होते. त्यामुळे सरीता ह्या एकट्याच घरी होत्या. काही काम असल्याने हेमराज यांनी दुपारी 1.30 वाजेच्या सुमारास घरी पत्नी सरीता यांना फोन केला. मात्र, कुणीही फोन उचलत नव्हते, त्यामुळे त्यांनी घराच्या शेजारीच राहणारी साली रेणुका शांताराम गावंडे हिला फोन करून सरीता यांना फोन उचलायला सांगे असे सांगितले. यामुळे रेणुका ही बहिणीच्या घरी गेली असता सरीता ही गळफास घेतल्याची दिसून आली. त्यानंतर तीन आरडा-ओरडा केल्यानंतर परिसरातील नागरिकांनी त्या ठिकाणी धाव घेतली. नंतर हेमराज यांना त्यांच्या पत्नीने गळफास घेतल्याचे कळविल्यानंतर त्यांनी घराकडे धाव घेतली. पत्नीचा मृतदेहा पाहील्यानंतर त्यांनी एकच आक्रोश केला. मृतदेह खाली उतरविल्यानंतर सायंकाळी जिल्हा सामान्य रूग्णालयात दाखल करण्यात आले. वैद्यकीय अधिकार्‍यांनी सरीता यांची तपासणी केल्यानंतर त्यांना मृत घोषित करण्यात आले. यावेळी रूग्णालयात एकच गर्दी केली होती.