समन्वय राखल्यास नैसर्गिक आपत्तीवर मात शक्य

शहादा । नैसर्गिक आपत्तीवर मात करण्यासाठी तालुका प्रशासन सज्ज असून सर्व अधिकारी व कर्मचार्‍यांनी सांघिक भावना आणि समन्वय राखल्यास नैसर्गिक आपत्तीवर मात करणे सहज शक्य असल्याचे प्राप्त अधिकारी लक्ष्मीकांत साताळक यांनी मार्गदर्शन करतांना सांगितले. जुन महिन्यात सुरू होणार्‍या मान्सूनपुर्व तयारीसाठी तालुक्यातील सर्व विभागप्रमुखांची बैठक तहसिल कार्यालयाच्या सभागृहात आयोजित कार्यक्रमात ते बोलत होते. यावेळी तहसिलदार मनोज खैरनार यांनी मान्सूनपुर्व करावयाच्या कामांचा प्रत्येक विभाग निहाय आढावा घेतला. याप्रसंगी गट विकास अधिकारी श्रीराम कागणे, विज वितरण कंपनीचे साय्यक अभियंता नरेश कोचरा, पोलिस निरिक्षक शिवाजी बुधंवत, कृषी अधिकारी एस.बी.बागुल, तालुका आरोग्य अधिकारी मोहन पटेल, कनिष्ठ अभियंता पाटबंधारे जी.बी. पाटील यांच्यासह विविध विभागाचे अधिकारी कर्मचारी उपस्थित होते.

यंत्रणा, आराखडे अद्यावत करण्याचे आवाहन
यावेळी आपत्ती व्यवस्थापन आराखडा, महत्वाच्या दुरध्वनी क्रमांकाच्या अद्यावत याद्या तयार करुन तालुका प्रशासनास सादर करणे. 24 बाय 7 विभाग निहाय नियंत्रण कक्ष स्थापन करणे. विभागनिहाय मदत व बचाव पथकांची स्थापना व नोडल ऑफीसर यांची नियुक्ती करणे. शहरातील सर्व लहान मोठ्या गटारी, नाले तसेच शहरातील सार्वजानिक विहीरीतील गाळ काढण्याच्या कामांना गती देणे. शहरातील अतिक्रमीत भागातील अतिक्रमणे त्वरीत दुर करणे. अग्निशमन दल सुसज्ज व अद्यावत ठेवणे तसेच अग्निशमन कार्यासाठी आवश्यक वाहनांची देखभाल दुरुस्ती करणे. विज वितरण कंपनीने विज व अटकाव यंत्रणा सज्ज असलेबाबत आपले स्तरावर खात्री करणे. धरणाच्या विसर्गाची माहिती ज्या-ज्या वेळी धरणातुन विसर्ग केला जाईल. त्या-त्यावेळी या कार्यालयाच्या नियंत्रण कक्षात कळविणे व योग्य दखल घेणे. विज वितरण कंपनीने विज वाहक तारांना अटकाव होणार्‍या झाडांच्या फांद्या काढून विज वाहक तारा मोकळ्या करणे. तसेच आपल्या विभागाशी संबंधीत सर्व यंत्रणा तसेच आराखडे अद्यावत करुन सुसज्ज करणे, अशा सुचना तहसिलदार मनोज खैरनार यांनी आयोजित बैठकीत उपस्थितांना केल्या.