सरकार माझ्या लेखणीवर चालते, मला मोबदला हवाय!
मुंबई ( निलेश झालटे)। केंद्र आणि राज्य सरकार हे माझ्या लेखणीमुळे चालत असून माझ्यामुळेच नरेंद्र मोदी हे पंतप्रधान तर देवेंद्र फडणवीस हे मुख्यमंत्री झाले आहेत. याचा मला मोबदला द्यावा अशी गजब मागणी करीत एका इसमाने मंत्रालयात अधिकार्‍यांना चांगलेच हैराण केलेय. आपण लेखक असल्याचे सांगत मंत्रालयात शिरून मोबदल्याच्या मागणीसाठी मंत्री आणि अधिकार्‍यांच्या दालनात तो खेटे घालत आहे. आपल्या फेसबुकवरील लेखनामुळे केंद्रात व राज्यात भारतीय जनता पक्षाचे सरकार आले असल्याचा दावा या इसमाने केला आहे.
मागणी मुख्यमंत्र्यांना सांगा! : दिलीप वाबळे असे या व्यक्तीचे नाव आहे. फेसबुकवर लिहिलेल्या लेखांमुळे लोकांवर प्रभाव पडून 2014 मध्ये केंद्रात व राज्यात भारतीय जनता पक्षाचे सरकार आले तसेच त्यानंतरही भाजपने देशातील ज्या काही राज्यांत सत्ता मिळाली तीदेखील वाबळे यांच्या लेखांमुळेच मिळाली असे ते म्हणतात. आणि यामुळेच त्यांना आता भाजपकडून वा सरकारकडून मोबदला हवा आहे. हीच मागणी घेऊन वाबळे पोहोचले ते मंत्रालयात . मुख्यमंत्री कार्यालयातील सर्वच अधिकार्‍यांची भेट घेऊन त्यांनी मला मोबदला मिळायला हवा आणि ही मागणी मुख्यमंत्र्यांपर्यंत पोहोचायला हवी अशी मागणी केली. या सगळ्या प्रकारानंतर मुख्यमंत्री कार्यालयातील अधिकारी चांगलेच हैराण झाले होते. कार्यालयातील अधिकार्‍यांनी सदर व्यक्तीचे म्हणणे शांतपणे ऐकून घेत त्यांना प्रेमाने समजावत परत पाठविले.
झेरॉक्स खर्चासाठी घर विकले! वाबळे म्हणाले की, माझे आधी धारावीत स्वतः चे घर होते. तेव्हा मी माझे लेख लिहून त्याच्या झेरॉक्स प्रती काढून वाटत असे. त्याचा खर्च इतका झाला की मी माझे घर विकले त्यानंतर मी माझे लेख फेसबुकवरून प्रकाशित करू लागलो. माझे फेसबुकवर हजारो फॉलोअर्स आहेत. त्यामुळे भाजपला माझ्या लेखांचा आणखी फायदा हवा असल्यास त्यांनी मला योग्य मोबदला द्यावा! असे वाबळे यांनी म्हटले आहे. वाबळे यांची फेसबुक प्रोफाईल तपासली असता त्यांच्या मित्रयादीत अवघे पाचजण मित्र असल्याचे आढळून आले.
मंत्रालयात सारेच चक्रावल
मंत्रालयात काहींची कामे खरी असतात आणि काहींची ही अशी. मध्यंतरी ‘मला नोबेल पारितोषिक मिळायला हवे’ ही मागणी घेऊन एक व्यक्ती मंत्रालयात फिरत असल्याची बातमी गाजली होती. आता या व्यक्तीने सत्तापरिवर्तन त्याच्या एकट्याच्या लेखनामुळे झाल्याचा दावा केल्याने मंत्रालयात सारेच चक्रावून गेले.