सरकार वडार समाजाच्या पाठीशी-मुख्यमंत्री

सोलापूर- सोलापूरमध्ये वडार समाजाच्या मेळाव्यात बोलतांना मुख्यमंत्री देवेंद्र फडणवीस यांनी वडार समाजाच्या विकासासाठी निधी देण्याची घोषणा केली. तसेच होतकरु तरुणांना व्यवसायासाठी निधी उपलब्ध करून देण्याची घोषणाही त्यांनी केली. प्रसिद्ध दिग्दर्शक नागराज मंजुळे यांचे उदाहरण देत नागराजसारख्या दिग्दर्शकांना स्टुडियोसाठी जागा उपलब्ध करुन देणार असल्याचे फडणवीस यांनी सांगितले.

नागराज मंजुळे यांनी आतापर्यंत फँड्री, सैराट यांसारख्या दर्जेदार चित्रपटांची निर्मिती केली आहे. वडार समाजाच्या पाठीशी उभे राहत त्यांना आवश्यक ती मदत करण्याचा सरकारचा प्रयत्न असल्याचे त्यांनी सांगितले.

वडार समाजाच्या व्यवसायासाठी १०० कोटी रुपये देणार असल्याचीही घोषणा मुख्यमंत्र्यांनी मंचावरून केली आहे. होतकरू तरूणांसाठी, समाज भूषणांसाठी ज्या ज्या आवश्यकता असतील त्या पूर्ण करण्यासाठी राज्य सरकार तुमच्या पाठिशी आहे असे आश्वासनही मुख्यमंत्र्यांनी दिले. पंढरीच्या विठुरायाचा रथ वडार समाजाशिवाय पुढे जाऊ शकत नाही, तर महाराष्ट्राच्या विकासाचा रथ वडार समाजाशिवाय महाराष्ट्र पुढे कसा जाईल? असे सांगत मुख्यमंत्र्यांनी वडार समाजाच्या आरक्षणाचा प्रश्न निकाली काढणार असल्याचे जाहीर केले.