सरपंच निवडणुकीसाठी आता नवी खर्चमर्यादा!

मुंबई । लोकनियुक्त सरपंच करण्याच्या निर्णय घेतल्यानंतर आता ग्रामपंचायतींच्या सरपंचपदाच्या थेट निवडणुकीतील खर्चावर सरकारकडून मर्यादा निश्चित करण्यात आली आहे. उमेदवारांसाठी ग्रामपंचायतींच्या सदस्यसंख्येनुसार 50 हजार ते 1 लाख 75 हजार रुपयांपर्यंत खर्च मर्यादा निश्चित करण्यात आली आहे. तसेच सदस्यपदाच्या निवडणुकीतील उमेदवारांसाठी 25 हजार ते 50 हजार रुपयांपर्यंत सुधारित खर्च मर्यादा निश्चित करण्यात आली आहे, अशी माहिती राज्य निवडणुक आयुक्त ज. स. सहारिया यांनी दिली.

सदस्य संख्येनुसार बदल
सहारिया यांनी सांगितले की, महाराष्ट्र ग्रामपंचायत अधिनियमात करण्यात आलेल्या सुधारणेनुसार आता सरपंचपदाची थेट निवडणूक घेण्यात येणार आहे. त्यासाठीच्या उमेदवारांकरिता राज्य निवडणूक आयोगाने खर्च मर्यादा निश्चित केली आहे. सरपंचपदाच्या उमेदवारासाठी संपूर्ण ग्रामपंचायत हे प्रचार क्षेत्र असेल. सर्व ग्रामपंचायतींच्या सदस्यपदाच्या निवडणुकांसाठी आयोगाच्या 30 जुलै 2011 च्या आदेशानुसार सरसकट 25 हजार रूपये खर्च मर्यादा निश्चित करण्यात आलेली होती. त्यातही आता सदस्य संख्येनुसार बदल करण्यात आला आहे.

सरपंचपदाच्या थेट निवडणुकीसाठी खर्च मर्यादा
7 व 9 ग्रामपंचायत सदस्य संख्या, 25,000 सदस्यपदाच्या उमेदवारांसाठी,50,000 सरपंचपदाच्या उमेदवारांसाठी, 11 व 13 सदस्य, 35,000 सदस्यपदाच्या उमेदवारांसाठी, 1,00,000 सरपंचपदाच्या उमेदवारांसाठी, 15 व 17 सदस्य, 50,000 सदस्यपदाच्या उमेदवारांसाठी, 1,75,000 सरपंचपदाच्या उमेदवारांसाठी खर्च मर्यादा निश्‍चित करण्यात आली आहे.