सवाई गंधर्व भीमसेन महोत्सवात चाळीसगावच्या विवेक सोनार यांना सादरीकरणाची संधी !

चाळीसगाव-सवाई गंधर्व महोत्सव कलाकारांसाठी तसेच रसिकांसाठी भारतीय शास्त्रीय संगीतातील “पंढरी” मानली जाते. अगदी दूर दूर वरुन रसिक श्रोता कार्यक्रमाचा आस्वाद घ्यायला पुण्याला जातात. भारतातील प्रत्येक कलाकारांसाठी अत्यंत मानाचा समजला जाणारा हा उत्सव यंदा खान्देसासाठी अधिक अभीमानाचा आहे. चाळीसगावचा भूमिपुत्र तथा जागतिक कीर्तीचे बासरीवादक पंडित हरिप्रसाद चौरासिया यांचे पट्ट शिष्य पंडित विवेक सोनार यांना आपली कला या व्यासपीठावर सादर करण्याची संधी मिळाली आहे. पंडित विवेक सोनार सवाई गंधर्व महोत्सवात सादरीकरण करणारे खान्देशातीलचे पहिले कलाकार ठरणार आहे.

१५ डिसेंबर रोजी सादरीकरण
शनिवारी १५ डिसेबर रोजी बासरी वादन सादर करणार आहेत. यावेळी त्यांना पं.भवानी शंकर पखवाज वर तर पं.रामदास पळसुले तबल्यावर साथ देणार आहे. सवाई गंधर्व भीमसेन महोत्सवात कलाकारांसाठी अभिजात शास्त्रीय संगीत सादर करण्याची संधी मिळावी हा मुळातच बहुमान आहे. पाच दिवस चालणाऱ्या या महोत्सवासाठी कसलेले कलाकार हेच श्रोते म्हणून उपस्थित राहत असल्याने या व्यासपीठावर प्रत्येक कलाकार आपली सर्वोच्च कला सादर करण्यासाठी धडपड करतो असे विवेक सोनार यांनी जनशक्तिशी बोलताना सांगितले.