सहकारी बँकांचा शाखा विस्तार हे आर्थिक सुबत्तेचे लक्षण – लक्ष्मण जगताप 

पिंपरी चिंचवड : एखाद्या भागात सहकारी बँकांचा शाखा विस्तार होणे, हे त्या परिसराच्या आर्थिक सुबत्तेचे तसेच परिसराच्या विकासाचे लक्षण आहे. पिंपरी चिंचवड भागात उद्यम विकास सहकारी बँकेच्या अधिकाधिक शाखा व्हाव्यात, यासाठी आपण सर्वतोपरी मदत करू, असे वचन आमदार लक्ष्मण जगताप यांनी दिले. उद्यम बँक ही राष्ट्रीय स्वयंसेवक संघाच्या परिवारातील बँक असून संघ संस्कारित स्वयंसेवक संचालक असून ते बँक चालवत असल्याने त्यांची समाजात विश्‍वासाहार्यता असून ते सचोटीने व्यवहार करतील अशी खात्री वाटते, असेही जगताप म्हणाले. चिंचवड गावातील केशवनगर काकडे पार्क येथे उद्यम बँकेच्या शाखेच्या स्थलांतर समारंभ प्रसंगी ते बोलत होते.

यावेळी महापौर राहुल जाधव, बँकेचे अध्यक्ष संदीप खर्डेकर, संचालक महेश लडकत, दिलीप उंबरकर, पांडुरंग कुलकर्णी, मनोज नायर, सीताराम खाडे, राजन परदेशी, महेंद्र काळे, मुख्य कार्यकारी अधिकारी दीपक देशपांडे, नगरसेवक अमोल थोरात, प्रमोद नसाल, विजय लांडे, शिवाजी शेडगे, विजय साबळे आदी मान्यवर व परिसरातील नागरिक मोठ्या संख्येने उपस्थित होते. उद्यम बँकेमार्फत छोट्या व्यावसायिकांना कर्ज उपलब्ध व्हावे, आणि त्यांना बँकेचा आधार वाटावा असा व्यवहार व्हावा, अशी अपेक्षा महापौर राहुल जाधव यांनी व्यक्त केली.

प्रास्ताविकात बँकेचे अध्यक्ष संदीप खर्डेकर यांनी बँकेच्या प्रगतीचा आलेख मांडताना समाजातील सर्व स्तरांना कर्ज उपलब्ध करून देऊ असे सांगितले. ए.टी. एम, फ्रँकिंग, वीजबिल व एलआयसी प्रीमियम भरण्याची सुविधा, सर्व अत्याधुनिक सुविधा उपलब्ध असून बँकेच्या दहा शाखांमधून दैनंदिन व्यवहार चालतात, असेही संदीप खर्डेकर यांनी नमूद केले. सीताराम खाडे यांनी सूत्रसंचालन तर पांडुरंग कुलकर्णी यांनी आभार मानले.