सहाराची मालमत्ता घेण्यास टाटा, गोदरेज, पतंजली इच्छुक

नवी दिल्ली – गुंतवणूकदारांचे पैसे हडप केल्याने थकवल्याने अडचणीत सापडलेले सुब्रतो रॉय यांच्या सहारा समुहाची संपत्ती आता विकत घेण्यासाठी देशातील बडे उद्योजक समोर येत आहेत. त्यासाठी टाटा, गोदरेज, अदानी यांच्यासह पतंजलीनेही सहारा यांची संपत्ती विकत घेण्यासाठी स्वारस्य दाखवले आहे. सहारा समुहाच्या 7,400 कोटी रुपयांच्या एकूण 30 मालमत्ता आहेत.

गुंतवणूकदारांचे पैसे बुडवणार्‍या सुब्रतो रॉय यांना सर्वोच्च न्यायालयाने तातडीने सेबीकडे पैसे भरण्याचे आदेश दिले आहेत. सहारा समुहाच्या संपत्तीचा लिलाव होणार असून लिलाव प्रक्रिया नाईट फ्रँक इंडिया या कंपनीमार्फत पार पडत आहे. सूत्रांनी दिलेल्या माहितीनुसार सहारा समुहाची मालमत्ता विकत घेण्यात ओमेक्स, एल्डेको तसेच इंडियन ऑईल अशा विविध कंपन्यांनी रस दाखवला आहे. लखनौमधील सहारा रुग्णालय विकत घेण्यासाठी चेन्नईतील अपोलो रुग्णालय इच्छुक आहे. लिलाव प्रक्रियेतील मालमत्तेचे दर हे जास्त आहेत. त्यामुळे इच्छुक खरेदीदार 2 ते 3 महिन्याचा अवधी मागत असल्याचे समजते.

गोदरेज, पतंजली, टाटा असे मोठे उद्योग समुहदेखील या लिलाव प्रक्रियेत सहभागी होण्याची शक्यता आहे. गोदरेज प्रॉपर्टीजच्या अधिकार्‍यांनी लिलावप्रक्रियेत सहभागी होणार असल्याच्या वृत्ताला दुजोरा दिला. नाईट फ्रँक कंपनीकडून आयोजित लिलाव प्रक्रियेत आम्ही सहभागी होऊ असे गोदरेज प्रॉपर्टीजच्या संचालकांनी सांगितले. सहारा समुहाच्या पुण्यातील मालमत्तेसाठी गोदरेज समुह बोली लावणार असे समजते. पतंजली, टाटा या कंपन्यांनी या वृत्तावर प्रतिक्रिया दिलेली नाही.