सांगलीनंतर अमरावती पोलिस अडचणीत!

मुंबई : सनदी अधिकारी राधेश्याम मोपलवार यांच्या कथित ऑडिओ प्रकरणाने आता वेगळेच वळण घेतले आहे. या प्रकरणी अमरावतीचे पोलिस उपअधीक्षक प्रवीण पाटील चौकशीच्या फेर्‍यात अडकले आहेत. आरोपी सतिश मांगलेच्या चौकशीतून धक्कादायक बाब पुढे आली असून, पाटील यांची चौकशी होण्याची शक्यता दाट शक्यता आहे. या प्रकरणात पोलिसांची भूमिका संशयास्पद असल्याचे स्पष्ट होत आहे.

ऑडिओ क्लिपमध्ये छेडछाड
वरिष्ठ सनदी अधिकारी राधेश्याम मोपलवार यांच्या ऑडिओ क्लिपचा फॉरेन्सिक रिपोर्ट सादर करण्यात आला. ऑडिओ क्लिपमध्ये छेडछाड केल्याची शक्यता या रिपोर्टमध्ये वर्तवण्यात आल्याने या प्रकरणाला वेगळे वळण लागणार आहे. सुरुवातीपासून वादग्रस्त ठरलेला समृद्धी महामार्ग प्रकल्प मोपलवारांच्या ऑडिओ क्लिपमुळे आणखी वादात अडकला. या प्रकल्पाचे तत्कालीन प्रमुख अधिकारी राधेश्याम मोपलवार यांचे वादग्रस्त फोन संभाषण समृद्धी महामार्गाला विरोध करणार्‍या शेतकर्‍यांच्या व्हॉट्सअप ग्रुपवर व्हायरल झाले होते.

मोपलवार यांच्यावर गंभीर आरोप
ज्या समृद्धी महामार्गावरून सरकार आणि शेतकर्‍यांमध्ये रण सुरु होतेे, त्याचवेळी महामार्गाची त्यावेळी जबाबदारी असणार्‍या मोपलवार यांच्यावर गंभीर आरोप झाले होते. धक्कादायक म्हणजे, हे आरोप सेटलमेंटचे होते. शेतकर्‍यांच्या मते या ऑडिओ क्लिपमध्ये मोपलवार आणि एक मध्यस्थ यांच्यात एका इमारतीच्या बांधकामावरून सेटलमेंट सुरु असल्याचे संभाषण होते.