साईंच्या दर्शनबारीत भक्ताचा मृत्यू

शिर्डी : साई समाधीच्या दर्शनासाठी आलेल्या तेलंगणातील साईभक्ताचा दर्शनबारीतच हृदयविकाराच्या तीव्र धक्क्याने मृत्यू झाला. दुपारच्या मध्यन्ह आरतीनंतर हा प्रकार घडला. सलग आलेल्या सुट्ट्या व 31 डिसेंबरच्या पार्श्वभूमीवर शिर्डीत भाविकांची अलोट गर्दी उसळली आहे. त्यामुळे साईसमाधीच्या दर्शनासाठी मोठा विलंब लागत असल्याने हा प्रकार घडला आहे. दरम्यान, रविवारी एका भाविकाचा भक्तनिवासातच मृत्यू झाला होता. हा भाविक जागतिक साईमंदीर विश्वस्त परिषदेच्या बैठकीसाठी आलेला होता.

थल्लूरी केशवराव भद्रय्या (वय 55) असे दर्शनबारीत मृत्युमुखी पडलेल्या भाविकांचे नाव आहे. ते खम्माम (तेलंगणा) येथील रहिवासी आहेत. आपल्या कुटुंबीयांसह ते शिर्डीला आले होते. दुपारी अकराच्या सुमारास कुटुंबासह ते मंदिर परिसरात आले होते. ते अपंग असल्याचे कुटुंबातील लोकांनी सांगितले. त्यांना टाईम दर्शन पास काढून आणण्यास सांगण्यात आले. ते पुन्हा रांगेकडे येऊन पास घेऊन मंदिराकडे आले, तेथे अपंग गेटच्या जवळच त्यांना त्रास जाणवू लागल्याने ते खाली बसले. तेथून त्यांना तातडीने संस्थानच्या मंदीर परिसरातील प्रथोमपचार कक्षात व नंतर साईबाबा रुग्णालयात दाखल करण्यात आले. मात्र, तोपर्यंत त्यांचा मृत्यू झाला होता. त्यांना रक्तदाब व मधुमेहाचा त्रास होता. त्यांना अधुनमधून झटकेही येत होते, असे त्यांचा मुलगा भरतकुमार व नातू राजू यांनी सांगितले. दरम्यान, शनिवारच्या जागतिक साई मंदिर विश्वस्त परिषदेसाठी आलेले भाविक के. एम. प्रकाश यांचा रविवारी सकाळी साईबाबा संस्थानच्या साई आश्रम एक या धर्मशाळेत मृत्यू झाला होता. ते आय ब्लॉकमधील रूम नंबर अकरामध्ये राहत होते. रविवारी सकाळी सव्वाआठच्या सुमारास त्यांचा मृत्यू झाला. ते दावणगिरी (कर्नाटक) येथील रहिवासी होते.