साईश्री दुकानातील चोरी उघड

जळगाव । मोबाईलवरील युट्युबवर वेगवेगळे दृष्य बघत असताना कटरने कुलुप तोडताना व सीसीटीव्ही कॅमेराला चिकटपट्टी चिकटवून चोरी करताचे दृष्य दिसल्याने दोन महाविद्यालीन तरुणांनी तीच पध्दत अवलंबवून शहरात दोन ठिकाणी चोरी केली. त्यांनी मू.जे.महाविद्यालयाच्या पाठीमागे असलेले मोबाईल व आईसस्क्रीमचे दुकान फोडले त्यानंतर रिंगरोडवरील दुकानातील फ्रिजमधून कोल्ड्रींक्स लांबविल्याचे उघड झाले आहे. रामानंद नगर पोलिसांनी या दोन्ही विद्यार्थ्यांचा छडा लावला आहे. गेल्या महिन्यात 25 जून रोजी मू.जे.महाविद्यालयाच्या पाठीमागे असलेल्या लक्ष्मी नगरात प्रवीण रमेश वारडे (रा.आरएमएस कॉलनी, जळगाव) यांच्या साई श्री मोबाईल नावाच्या दुकानाचे कुलुप कटरने तोडून चोरट्यांनी त्यातील 5 मोबाईल,आईस्क्रीम, सॅँडविच, चॉकलेट, कॅडबरी व रोख रक्कम असा 34 हजाराचा ऐवज लांबविला होता. तर त्याच रात्री रिंगरोडवरील हॉटेल चाट लाऊंज बाहेरील फ्रीजचे कुलूप तोडून सहा हजाराची शितपेय लांबविली होती. सीसीटीव्ही कॅमेर्‍यात कैद होऊ नये म्हणून त्यांनी दोन कॅमेर्‍यांना चिकटपट्टी लावली होती.या दोन्ही चोर्‍या याच विद्यार्थ्यांनी केल्याचे निष्पन्न झाले.

गुन्हे पथकाने लावला छडा
दोन्ही ठिकाणच्या चोरीच्या गुन्ह्यात अल्पवयीन मुलेच आढळून आल्याने पोलीस निरीक्षक बी.जी.रोहम यांनी गुन्हे शोध पथकाचे सहायक फौजदार गोपाळ चौधरी, प्रदीप चौधरी, विजय खैरे, शरद पाटील, विलास शिंदे, हितेश बागुल, अर्जून लावणे, अतुल पवार, ज्ञानेश्वर कोळी, दिलीप चिंचोले यांच्या पथकाला रेकॉर्ड नसलेल्या परंतु, संशयित असलेल्यांची चौकशी करण्याच्या सूचना दिल्या होत्या. त्यानुसार आठ दिवसाच्या मेहनतीनंतर हे दोन्ही विद्यार्थी हाती लागले. अपर पोलीस अधीक्षक बच्चन सिंह व उपअधीक्षकसचिन सांगळे यांनी या दोन्ही विद्यार्थ्यांची चौकशी केली असता त्यात निव्वळ मौजमस्ती हेच कारण स्पष्ट झाले.