साउंड सिस्टिम न देण्याचा मालकांचा निर्णय

पुणे । दहीहंडी, गणेशोत्सव यांसारखे सण तोंडावर आले आहेत. मात्र या सणांना साउंड सिस्टिम देणार नसल्याचा निर्णय मुंबई आणि पुण्यातील साउंड सिस्टिम मालकांनी घेतला आहे.
न्यायालयाने घालून दिलेली डेसिबलची मर्यादा आणि ती उलटल्यास होणारी कारवाई, या पार्श्वभूमीवर हा निर्णय घेण्यात आला आहे. साउंड सिस्टिम मालकांच्या या निर्णयाला दहीहंडी समन्वय समितीनेही पाठिंबा दिला आहे. तसेच दहीहंडी समन्वय समितीने दहीहंडी उत्सव साजरा न करण्याचा इशारा दिला आहे. डॉल्बीच्या दणदणाटामुळे दरवर्षीच साउंड सिस्टिम आणि आवाजाच्या मर्यादेबाबत प्रश्‍न उपस्थित केले जातात. शिवाय डेसिबलची मर्यादा ओलांडल्यास डॉल्बी मालकांना कारवाईला सामोरे जावे लागते. या सर्व प्रकारामुळे साउंड सिस्टिम मालकांनी यंदा दहीहंडी, गणेशोत्सवात साउंड सिस्टिम न देण्याचा इशारा दिला आहे.