सागवान लाकडाची चोरटी वाहतूक ; पथकाला पाहताच आरोपी पसार

25 हजारांची सागवानी लाकुड जप्त ; यावल वनविभागाच्या गस्ती पथकाची कारवाई

यावल- यावल वनविभागाच्या गस्ती पथकाला कोरपावली रस्त्यावरून एक संशयीत ईसम दुचाकीवरून लाकडाची वाहतूक करीत असताना आढळल्याने त्यास हटकले असता त्याने पथकाला पाहताच लाकूड फेकून पोबारा केला. घटनास्थळावरून चार हजार 183 रुपये किंमतीचे सागवानी लाकूड जप्त करून ते यावल डेपोत जमा करण्यात आले तर दुसर्‍या कारवाईत 11 रोजी दुपारी अडीच वाजता आडगाव ते मनुदेवी जाणार्‍या रस्त्याच्या डाव्या बाजूला असलेल्या जुना प्लॉट भागातील पडीत गोठ्यातून सागवानी लाकडाचे तयार फर्निचर., चार हजार 439 रुपये किंमतीचे 71 सागवानी पाट्या असा मुद्देमाल मिळून 25 हजारांचे लाकूड यावल डेपोत जमा करण्यात आले. दरम्यान, असे असलेतरी प्रत्यक्षात या लाकडाची बाजार भावातील किंमत सुमारे 75 हजार इतकी असल्याचे सांगण्यात आले.

यांनी केली कारवाई
ही कारवाई यावल उपवनसंरक्षक प्रकाश मोरणकर, धुळे विभागीय वनाधिकारी उमेश वावरे यांच्या मार्गदर्शनाखाली यावल गस्ती पथकाचे वनक्षेत्रपाल एस.आर.पाटील, वनरक्षक रवींद्र बी.पवार, वनरक्षक संदीप पंडित, पोलिस कॉन्स्टेबल सचिन तडवी, वाहन चालक भरत बाविस्कर आदींच्या पथकाने केली.