साताऱ्यात जीप दरीत कोसळली; चार जणांचा मृत्यू

सातारा : साताऱ्यात भीषण अपघाताची घटना घडली आहे. नियंत्रण सुटलेली जीप २५० फूट खोल दरीत कोसळली. हि घटना शनिवारी घडली असून या अपघातात चार जणांचा मृत्यू झाला असून ९ जण या अपघातात जखमी झाले आहेत. भोजलिंगाच्या दर्शनासाठी जात असताना हा अपघात घडला.

सांगलीतील काही भाविक माण तालुक्यातील डोंगरावरील श्री भोजलिंग देवस्थानच्या दर्शनासाठी जात होते. म्हसवड येथील जांभुळणीकडील डोंगर उतारावर चालकाचे जीपवरील नियंत्रण सुटले आणि जीप दरीत कोसळली. जीप दरीत कोसळल्याने चार भाविकांचा मृत्यू झाला. जीपमध्ये एकूण १३ जण होते. अपघातात जखमी झालेल्या उर्वरित नऊ जणांना उपचारासाठी म्हसवड येथील ग्रामीण रुग्णालयात दाखल करण्यात आले आहे. दर्शनासाठी जात असलेली जीप आटपाडी येथील विटलापूर येथील असल्याचे समजते.