साधूंच्या वेशात दहशतवादी

लखनऊ । आता दहशतवाद्यांनी नवी शक्कल लढवली आहे. देशात मोठी धार्मिक तेढ निर्माण करूण दंगल घडवण्याचा त्यांचा डाव आहे. त्यासाठी हल्ला करणार्‍या दहशतवाद्यांना साधूचा गणवेश दिला जाणार असून एक विशिष्ठ प्रशिक्षणही त्यांना देण्यात आले आहे. त्यांच्याकडून उत्तर प्रदेशात दहशतवादी हल्ला करत मोठा घातपात घडवण्याचा कट आखण्यात आला आहे, अशी माहिती मध्यप्रदेश पोलिसांच्या गुप्तचर विभागाने दिली आहे. त्यानंतर अलर्ट जारी करण्यात आला असून उत्तरप्रदेश पोलिसयंत्रणा सतर्क झाली आहे. दहशतवादी संघटनांनी या घातपातासाठी तरुणांची निवड केली असून त्यांना हिंदू धर्माचे विशेष प्रशिक्षण दिले आहे. महत्वाची धार्मिक स्थळे आणि प्रतिष्ठित संस्था दहशतवाद्यांच्या टार्गेटवर आहेत.

17 ते 18 वर्षांच्या तरूणांचा समावेश
मध्य प्रदेश पोलिसांच्या गुप्तचर विभागाकडून मिळालेल्या माहितीनुसार दहशतवादी कारवाया करण्यासाठी पाठवण्यात आलेले तरुण 17 ते 18 वर्षांचे आहेत. या सर्वांना हिंदू धर्माच्या रुढी, परंपरांची माहिती देण्यात आली आहे. हे सर्वजण साधू, संतांच्या वेशात असतात. याचवर्षी फेब्रुवारी महिन्यात दहशतवादी संघटनेने 20 ते 25 तरुणांना भारत – नेपाळ सीमारेषेवरुन मध्य प्रदेशात पाठवले आहे. उत्तर प्रदेशात प्रवेश केल्यानंतर हिंदू वस्तींमध्ये त्यांनी वास्तव्य केले आहे. पोलीस आणि सुरक्षा यंत्रणांपासून वाचण्यासाठी दहशतवाद्यांनी आपले नावही बदलले असून ते भाड्याच्या घरात राहत आहेत.

धार्मिक स्थळे आणि महत्वाच्या ईमारतींना लक्ष्य
अयोध्या, काशी, मथुरा याशिवाय ताजमहल, अलाहाबाद आणि लखनऊ उच्च न्यायालय इमारत, विधान भवन, सतिवालय याशिवाय रेल्वे स्टेशन आणि गर्दीची ठिकाणं दहशतवाद्यांच्या रडारवर आहेत. पाकिस्तानची गुप्तहेर संघटना आयएसआयने हिंदू धर्माचे प्रशिक्षण देत हस्तकांना हिंदू वस्तीत प्रवेश करुन देण्यासाठी ऑपरेशन कृष्णा इंडिया सुरु केले होते. हे एजंटदेखील त्याचाच भाग असण्याची शक्यता आहे. या हस्तकांना साधूंच्या वेशात धार्मिक स्थळांवर पाठवून आपले काम करुन घेण्याची योजना आहे. यानंतर हे लोक धार्मिक द्वेष पसरवत मोठा घातपात घडवण्याचा कट आखू शकतात.