साध्वी प्रज्ञा सिंहांचा भाजपात प्रवेश !

नवी दिल्ली: मालेगाव बॉम्बस्फोटातील मुख्य आरोपी साध्वी प्रज्ञा सिंह ठाकूर यांनी आज भाजपमध्ये प्रवेश केला. गेल्या काही दिवसांपासून ते भाजपात प्रवेश करणार असल्याची चर्चा होती. साध्वी प्रज्ञा भोपाळ मतदारसंघातून मध्य प्रदेशचे माजी मुख्यमंत्री काँग्रेस नेते दिग्विजय सिंह यांच्याविरोधात लढण्याची शक्यता आहे.

भाजप प्रवेशानंतर साध्वी प्रज्ञा यांनी प्रसारमाध्यमांशी संवाद साधला. मी भाजपमध्ये अधिकृतरित्या प्रवेश केला आहे. मी निवडणूक लढवेन आणि जिंकेनही, असे तिने सांगितले. भोपाळ मतदारसंघातून लढण्यासाठी भाजपला उमेदवार मिळत नव्हता. मध्य प्रदेशचे माजी मुख्यमंत्री शिवराज सिंह चौहान आणि उमा भारती यांनी भोपाळमधून लढण्यास नकार दिला होता. त्यामुळे आता काँग्रेसच्या दिग्विजय सिंह यांच्याविरोधात साध्वी प्रज्ञा यांना रिंगणात उतरवण्याचा भाजपचा विचार आहे. आज संध्याकाळपर्यंत याबाबत अधिकृत घोषणा होऊ शकते.

साध्वी प्रज्ञा २००८ सालच्या मालेगाव बॉम्बस्फोट खटल्यातील आरोपी आहेत. सध्या त्यांची जामिनावर सुटका करण्यात आली आहे. या बॉम्बस्फोटात सहा जणांचा मृत्यू झाला होता तर १०१ जण जखमी झाले होते.