साहित्य संमेलनाची निवडणूक जाहीर

पुणे । ९१ व्या अखिल भारतीय मराठी साहित्य संमेलनाच्या अध्यक्षपदाचा निवडणुकीचा कार्यक्रम सोमवारी महामंडळाचे अध्यक्ष डॉ. श्रीपाद जोशी यांनी जाहीर केला. निवडणुकीची प्रक्रिया ५ ऑक्टोबरपासून सुरू होणार असून अध्यक्षाची घोषणा १० डिसेंबर रोजी करण्यात येणार आहे. यासंदर्भात, विदर्भ साहित्य संघात झालेल्या अ.भा.मराठी साहित्य महामंडळाच्या बैठकीत निवडणुकीचा कार्यक्रम जाहीर करण्यात आला.

अध्यक्षपदासाठी उमेदवारांनी १४ ऑक्टोबरला सायं. ५ वाजतापर्यंत आपले अर्ज घटक संस्था, समाविष्ट संस्था व संलग्न संस्थांकरवी महामंडळाकडे सादर करायचे आहेत. त्याच दिवशी सायं. ७ नंतर उमेदवारांची नावे जाहीर करण्यात येतील. उमेद्वारांना अर्ज मागे घेण्यासाठी २३ ऑक्टोबरपर्यंतची मुदत देण्यात आली आहे. त्यानंतर, २३ ऑक्टोबर रोजीच अंतिम उमेदवारांची यादी जाहीर करण्यात येईल. ३१ ऑक्टोबरपर्यंत मतदारांकडे मतपत्रिका रवाना करण्यात येतील. त्या मतपत्रिका ९ डिसेंबरपर्यंत निर्वाचन अधिकार्‍यांना पाठवण्यात येतील. १० डिसेंबर रोजी मतमोजणीनंतर अध्यक्षपदाचा निकाल जाहीर करण्यात येणार आहे, अशी माहिती डॉ. श्रीपाद भा. जोशी यांनी दिली.