‘सीआयए’च्या उलट्या बोंबा!
‘सीआयए’ (सेन्ट्रल इन्व्हेस्टिगेशन एजन्सी) या अमेरिकेच्या गुप्तचर यंत्रणेने यावर्षी प्रसिद्ध केलेल्या ‘वर्ल्ड फॅक्ट बूक’मध्ये ‘विश्‍व हिंदू परिषद आणि बजरंग दल या धार्मिक आतंकवादी संघटना आहेत, तर जमियत उलेमा-ए-हिंद ही धार्मिक संघटना आहे’, असा उल्लेख केला आहे. याला ‘फॅक्ट’ म्हणण्यापेक्षा ‘फेक अ‍ॅलिगेशन्स’ म्हणणे अधिक संयुक्तिक ठरेल. याचा शासन स्तरावर ठोस प्रतिवाद होणे, तर अपेक्षित आहेच, पण विदेशी यंत्रणांच्या मनमानी आरोपांना कायदेशीर लगाम बसणेही आवश्यक आहे.
कुठल्याही देशाची जागतिक गुप्तचर यंत्रणा मानवतेच्या प्रेरणेने काम करत नसते. अमेरिकेची गुप्तचर यंत्रणा तर नाहीच नाही. देशांतर्गत आणि परदेशातील गुन्हेगार, शत्रूच्या कारवाया यांवर तसेच अपवादात्मक परिस्थितीत जनतेवर पाळत ठेवण्यासाठी या संघटना कार्यरत असतात. ‘सीआयए’ या अमेरिकेच्या गुप्तचर यंत्रणेची तर स्वतःचीच अशी एक आतंकी पार्श्‍वभूमी आहे. वर्ष 1980 ते 1989च्या काळात जेव्हा सोव्हिएत युनियन आणि अफगाणिस्तान यांमधील युद्धामध्ये अफगाणिस्तानचा पाडाव होत सोव्हिएत युनियन प्रभावी होत चालली होती, तेव्हा याच ‘सीआयए’ने अफगाणी आतंकवाद्यांना (मुजाहिदींना) घातक शस्त्रास्त्रे पुरवली. केवळ शस्त्रास्त्रे पुरवली नाहीत, तर ते वापरण्याचे प्रशिक्षणही दिले. ओसामा बिन लादेनला सर्वार्थाने ‘मोठे’ करण्यात सीआयएचा महत्त्वाचा वाटा होता.
याच गुप्तचर यंत्रणेने पाकिस्तानातील जिहादी संघटनांना मुक्तहस्ते सहकार्य केले. ओसामा बिन लादेन याचा सहकारी असलेल्या हक्कानी याचे पाकिस्तानातील हक्कानी नेटवर्क आणि अल कायदा यांची स्थापना आणि वाढ होण्याला ‘सीआयए’ कारणीभूत होती. अमेरिकेने पोसलेला आतंकवाद जेव्हा त्यांच्यावरच उलटला आणि ‘वर्ल्ड ट्रेड सेंटर’वर आतंकवादी आक्रमण झाले, तेव्हा मात्र अमेरिकेने ‘आतंकवादमुक्ती’चे नारे द्यायला प्रारंभ केला. या सूत्रावरून वरकरणी का असेना जेव्हा अमेरिकेने पाकिस्तानला आतंकवादी संघटनांवर कारवाई करण्यास सांगितले, तेव्हा ‘हक्कानी नेटवर्क हे तर ‘सीआयए’चे लाडके अपत्य आहे’, अशी स्पष्टोक्ती पाकिस्तानने केली होती. जी संघटना कुख्यात आतंकवादी हाफीज सईदला संरक्षण देते, आतंकवादाचे उगमस्थान असलेल्या पाकिस्तानला कोट्यवधी रुपयांचे अर्थसाहाय्य करते, त्यांनी भारतातील राष्ट्रनिष्ठ संघटनांना आतंकवादी म्हणण्याचा शहाणपणा करू नये.
‘सीआयए’चा भारतद्वेष आणि हिंदूद्वेष
‘सीआयए’ने त्याच्या संकेतस्थळावर जगभरातील देशांचा इतिहास, तेथील लोक, सरकारे, अर्थव्यवस्था, ऊर्जा, भूगोल, दळणवळण, जनसंपर्क, सैन्य आणि अशा अनेक गोष्टींची माहिती दिली आहे. भारताच्या इतिहासाविषयी माहिती देताना ‘आर्य-द्रविड’ वादाचा संदर्भ दिला आहे. जम्मू-काश्मीरमधील काही भाग भारतातून वगळून भारताचा विकृत नकाशा प्रसिद्ध केला आहे. भारतातील काही वास्तूंच्या दर्शवलेल्या छायाचित्रांमध्ये प्रामुख्याने इस्लामी वास्तूंचा समावेश केला आहे. आज संपूर्ण विश्‍व तिसर्‍या महायुद्धाच्या उंबरठ्यावर येऊन ठेपले असून, त्याचा भडका कधी उडेल, ते सांगता येणार नाही. तीव्र झालेली अण्वस्त्र स्पर्धाच त्याला कारणीभूत ठरणार आहे. ‘आम्ही अण्वस्त्रे निर्माण करणार. मात्र, अन्य देशांनी ती करू नये’, या वृत्तीतून अमेरिकेने अण्वस्त्र निर्मितीवर निर्बंध घातले. काही देशांवर उघडपणे, तर काही देशांवर छुप्या पद्धतीने. इतर देशात कार्य करून त्यांच्या देशाच्या शत्रूच्या विरोधकांना संपवण्यासही हे गुप्तहेर मागेपुढे पाहत नाहीत. ज्येष्ठ अणुशास्त्रज्ञ डॉ. होमी भाभा भारतासाठी लाभदायक पर्यायाने अमेरिकेसाठी ‘धोकादायक’ असल्याने ‘सीआयए’ने डॉ. भाभा यांच्या विमानाचा अपघात घडवून आणला, अशी धक्कादायक माहिती ढइठ छशुी या संकेस्थळाने उघड केली होती, अशा भारतद्वेषी आणि हिंदूद्वेषी संघटनेच्या मनमानी निष्कर्षांना भीक न घालता त्याचे सडेतोड प्रत्युत्तर दिले जाणे अपेक्षित होते, पण दुर्दैवाने ते शासनस्तरावरून ते मिळाले नाही. आरोप झालेल्या संघटना सध्याच्या सरकारच्या पितृसंघटनेच्या कुळातील असूनही.
हिंदुत्वाचा बुलंद आवाज
गेल्या काही वर्षांमध्ये भारतामध्ये एकीकडे हिंदुत्व बळकट होत असताना दुसरीकडे त्याला होणारही विरोधही वाढत आहे. त्यामुळेच हिंदूविरोधकांनी ‘सीआयए’ची ही पूर्वग्रहदूषित सूत्रे डोक्यावर घेतली आणि हिंदुत्वविरोधाचा कंड शमवून घेण्याचा प्रयत्न केला. ज्याप्रमाणे कावळ्याच्या शापाने गाय मरत नाही, त्याप्रमाणे राष्ट्रनिष्ठ संघटनांना कुणी आतंकवादी संघटना म्हणाल्याने त्या तशा ठरत नाहीत. विश्‍व हिंदू परिषद आणि बजरंग दल या दोन्ही संघटना देशातील हिंदूंच्या एकत्रीकरणासाठी आणि धर्मरक्षणासाठी प्रयत्नशील आहेत, अशा संघटनांचा जगातील एका बलाढ्य देशाची गुप्तचर यंत्रणा नोंद घेते, हे हिंदुत्वाचा आवाज बुलंद होत असल्याचेच लक्षण आहे. याच आवाजामुळे कदाचित ‘सीआयए’च्या उलट्या बोंबा बंद होतील.
– चेतन राजहंस,
प्रवक्ता, सनातन संस्था
7775858387