सीआरपीएफच्या छावणीवर पुन्हा हल्ला

नवी दिल्ली। भारतीय जवानांनी जुनैद मट्टू या दहशतवाद्यांचा खात्मा केल्यानंतर संतापलेल्या दहशतवाद्यांनी जम्मू काश्मीरच्या बिझबेहडा येथील सुरक्षा रक्षकांच्या कॅम्पवर हल्ला केलाय. सूत्रांनी दिलेल्या माहितीनुसार दहशतवाद्यांनी बिजबेहडा येथील सी कॉप कॉम्प्लेक्सवर हल्ला केलाय. इथेच सीआरपीएफ जवान थांबलेले आहेत. अनंतनाग येथील बिजबेहारा येथे राष्ट्रीय रायफल्सचा हा तळ आहे. अधिक माहिती समजू शकलेली नाही. या हल्ल्यात कोणी जखमी झाल्याचे वृत्त नाही. सुरक्षा दलांनी संपूर्ण परिसराला वेढा घातला असून सर्च ऑपरेशन राबवण्यात येत आहे. दरम्यान, अनंतनाग येथे पोलिसांच्या पथकावर शुक्रवारी संध्याकाळी दहशतवाद्यांनी हल्ला केला होता. दहशतवाद्यांनी केलेल्या गोळीबारात पोलीस उपनिरीक्षकासह सहा जवान शहीद झाले.

24 तासांमधील तिसरा हल्ला
जम्मू- काश्मीरमध्ये पोलिसांवरील दहशतवादी हल्ल्याची ही गेल्या 24 तासांमधील तिसरी घटना आहे. दहशतवाद्यांनी गुरुवारी रात्री श्रीनगरमधील हैदरपोरा येथे पोलीस पथकावर अंदाधुंद गोळीबार केला होता. या हल्ल्यात दोन पोलीस गंभीर जखमी झाले होते. त्यांना लष्कराच्या रुग्णालयात दाखल करण्यात आले होते. गंभीर जखमी झालेले कॉन्स्टेबल शहजाद यांचा मृत्यू झाला.