सीएमएस शाळेत विद्यार्थी पर्यावरण समितीची स्थापना

पिंपरी-चिंचवड : पर्यावरण संवर्धनासाठी विशेष कार्य करणार्‍या पर्यावरण संवर्धन समितीच्या पुढाकाराने निगडी येथील सीएमएस शाळेत विद्यार्थी पर्यावरण समितीची स्थापना करण्यात आली. विद्यार्थी पर्यावरण समितीच्या माध्यमातून आता पर्यावरण संवर्धनाचे कार्य पुढे सुरू राहणार आहे. या कार्यक्रमप्रसंगी विकास पाटील यांनी विद्यार्थी पर्यावरण समितीच्या सदस्यांना इको क्लबचे महत्व समजावून सांगितले. त्यानंतर समितीला पर्यावरणपूरक साहित्याचे वाटप करण्यात आले.

यांची होती उपस्थिती
यावेळी जागतिक बँकेचे ज्येष्ठ सल्लागार विश्वास जपे, विनय मोने, प्रभाकर मेरूकर, गोविंद चितोडकर, अनिल दिवाकर, मीनाक्षी मेरूकर, रंजना कुदळे, मोनिका शर्मा, उज्ज्वला पवार, मुख्याद्यापिका बी. जी. गोपाकुमार, संचालक टी. पी. विजयान, जनार्धन, सोफिया मार्गारेट, मेधा भक्ता यांच्यासह शाळेतील शिक्षक व कर्मचारी उपस्थित होते.

विद्यार्थ्यांना मार्गदर्शन
प्लास्टिकचा वापर कमी करणे व पर्यावरणपूरक दिवाळी साजरी करण्याबाबत विद्यार्थ्यांना मार्गदर्शन करण्यात आले. या शाळेत 2200 विद्यार्थी शिक्षण घेत आहेत. इंग्रजीच्या शिक्षणासाठी अनुकूल शाळा म्हणून, या शाळेला परिसरात ओळखले जाते. पर्यावरणाविषयी विद्यार्थ्यांच्या मनात आवड निर्माण व्हावी, या उद्देशाने शाळेत समितीची स्थापना करण्यात आली आहे.