सुप्रिम कॉलनीत तरूणाची गळफास घेवून आत्महत्या

जळगाव : शहरातील सुप्रिम कॉलनी येथील तरूणाने राहत्या घरात गळफास घेवून आत्महत्या केल्याची घटना बुधवारी पहाटे 5 वाजता उघडकीस आली. प्रभाकर ज्ञानदेव पाठक वय-40 असे मयताचे नाव आहे. दुपारी जिल्हा रूग्णालयात त्यांच्या मृतदेहावर शवविच्छेदन करण्यात आले असून रूग्णालयात नातेवाईकांनी आक्रोश करीत एकच गर्दी केली होती. प्रभाकर पाठक हे पत्नी, मुलगा-मुली, आई वडीलांसोबत राहत होते. पाठक हे हमाली काम करून आपल्या परिवाराचा उदरनिर्वाह करत होते. बुधवारी पहाटे 5 वाजेच्या सुमारास पाठक यांनी गळफास घेवून आत्महत्या केली.

पहाटे वडील ज्ञानदेव पाठक यांना झोपेतून उठल्यानंतर प्रभाकर यांनी गळफास घेतल्याचे त्यांना दिसून आले. तात्काळ त्यांनी घटनास्थळी आरडा-ओरड केल्यानंतर कुटूंबियांनी घटनस्थळीच्या दिशेने धाव घेतल्यानंतर त्यांना प्रभाकर हे गळफास घेतलेले दिसले. प्रभाकर यांना खाली उतरवून जिल्हा रूग्णालयात दाखल केले. डॉक्टरांनी तपासणी केल्यानंतर त्यांना मृत घोषित केले. एमआयडीसी पोलीसांनी घटनास्थळी येवून पंचनामा केला. दुपारी प्रभाकर पाठक यांच्या मृतदेहावर शवविच्छेदन करण्यात आले. यावेळी नातेवाईकांनी रूग्णालयात एकच गर्दी केली होती. पाठक यांच्या पश्‍चात पत्नी, मुलगी रूपाली, मयुरी, मुलगा हर्षल, आई-वडील, भाऊ असा परिवार आहे.