सुरक्षारक्षकाची गळफास घेवून आत्महत्त्या

जळगाव । एमआयडीसी परिसरातील एका कंपनीत सुरक्षारक्षकाने गळफास घेवून आत्महत्या केल्याची घटना 5 रोजी सकाळी 8 वाजेच्या सुमारास उघडकीस आली. एमआयडीसीतील एफ -66 सेक्टरमध्ये साईराम प्लॉस्टीक कंपनी असून या ठिकाणी विश्वास मकडू चौधरी वय 46 रा. रामेश्वर कॉलनी हे गेल्या 4 महिन्यापासून सुरक्षारक्षक म्हणून काम करीत होते. 4 रोजी रात्री ते नेहमी प्रमाणे साईराम प्लॉस्टिक येथे डयुटीवर आले. याठिकाणी रात्री 11.30 वाजेपर्यंत ते शेजारील कंपन्यांमधील कर्मचार्‍यांशी बोलत होते. त्यानंतर ते कंपनीत गेले.

कर्मचार्‍याला लक्षात आली घटना
त्याठिकाणी असलेल्या एका रुममध्ये त्यांनी गळफास घेवून आत्महत्या केली. गणेश विसर्जनामुळे कंपनीला सुट्टी असल्याने सकाळी उशिरापर्यंत हा प्रकार कोणाच्याही लक्षात आला नाही. सकाळी 8 वाजेच्या सुमारास कंपनीतील सुनिल विलास महाजन हे कंपनीत आले असता, त्यांना विश्वास चौधरी यांनी आत्महत्या केल्याचे दिसून आले. महाजन यांनी त्यांच्या घरी जावून कुटुंबियांना माहिती दिली. त्यानंतर मृतदेह पोलिसांच्या समक्ष खाली उतरवून शवविच्छेदनासाठी जिल्हा सामान्य रुग्णालयात आणण्यात आला. जिल्हा रुग्णालयात कुटुंबिय व नातेवाईकांनी आक्रोश केला. त्यानंतर शवविच्छेदन करून मृतदेह कुटुंबियांच्या स्वाधीन करण्यात आला. याघटनप्रकरणी एमआयडीसी पोलिस स्टेशनला अकस्मात मृत्यूची नोंद करण्यात आली आहे.