सेवानिवृत्त फौजदाराचा पत्नीसह जिल्हाधिकारी कार्यालयात आत्मदहनाचा प्रयत्न

फैजपूर डीवायएसपी नरेंद्र पिंगळे व पो.उपनि. जिजाबराव पाटील यांच्याकडून मानसीक त्रास ; जिल्हापेठ पोलिसांनी प्रयत्न हाणून पाडला

जळगाव : फैजपूर उपविभागीय पोलीस अधिकारी नरेंद्र पिंगळे व पो.उपनि. जिजाबराव पाटील यांच्याकडून होणार्‍या मानसीक त्रासाला कंटाळून सेवानिवृत्त सहाय्यक फौजदा शेक शकील शेख दगू यांनी पत्नीसह जिल्हाधिकारी कार्यालयात आत्मदहनाचा प्रयत्न केल्याची घटना दि. 9 रोजी घडली. जिल्हा पेठ पोलिसांनी दोघांना वेळेत ताब्यात घेतल्याने पुढील अनर्थ टळला.

तक्रारी करुन अवैधधंदे बंद केल्याचा राग
याबाबत मिळालेल्या माहितीनुसार सेवानिवृत्त सहाय्यक फौजदार शेख शकील शेख दगू हे पत्नी हजराबी शकील शेख व मुलगा साहिल यांच्यासह मिल्लत नगर, फैजपूर येथे राहत असून पोलीस खात्यातून सेवानिवृत्त झाल्यानंतर त्यांनी शिवसेना पक्षात प्रवेश करत जनसेवेला सुरुवात केली आहे. दरम्यान, फैजपूर परिसरात मोठ्या प्रमाणात अवैध धंदे सुरु असून ते बंद करण्यात यावे या मागणीसाठी गेल्या तीन वर्षापासून ते लेखी तक्रारी करत आहे. यासाठी त्यांनी उपोषण ही केले होते. त्यानंतर परिसरातील अवैध धंदे बंद झाल्याने रावेर पोलीस स्टेशनचे तत्कालीन प्रभारी अधिकारी नरेंद्र पिंगळे यांना मिळणारे लाचेचे पैसे बंद झाल्याने त्यांना राग आला असल्याचे म्हणत या रागा पोटीच त्यांनी आपला मानसीक छळ करणे सुरु केला असल्याचे शेख शकील शेख दगू म्हणाले.

हद्दपार करण्याची अधिकार्‍यांकडून धमकी
दि. 18 जुलै 2019 रोजी काही गुंड प्रवृत्तीनी आपल्यावर हल्ला केला. याबाबत कायदेशीर गुन्हा दाखल केला असतांनाही डीवायएसपी नरेंद्र पिंगळे व पीएसआय जिजाबराव पाटील यांनी आरोपितांशी संगनमत करत माझ्या व माझ्या परिवारावर खोटा गुन्हा दाखल केला आहे. यासह दोघं अधिकार्‍यांकडून मला हद्दपार करण्याची धमकी तसेच माझ्या पत्नीच्या चारित्र्याची बदनामीची धमकी दोन्ही अधिकार्‍यांकडून देण्यात येत असून या मानसीक त्रासाला कंटाळून आपण पत्नीसह आत्मदहन करत असल्याचे निवेदन सेवानिवृत्त सहाय्यक फैजदार शेख शकील शेख दगू यांनी दिले आहे.

सीबीआय चौकशी करण्याची मागणी
फैजपूर शहरात माझ्यावर गुंडांनी प्राण घातक हल्ला करुन मला मारहाण केली आहे. मी त्यांच्याविरुध्द फैजपूर पोलीस स्टेशनला गुन्हा दाखला झालेला आहे. मात्र आरोपींना अटक न करता उलट डीवायएसपी पिंगळे यांनी त्यांच्याशी हात मिळवणी करुन माझ्यावर व माझ्या परिवारावर संगनमताने खोटा गन्हा दाखल केला आहे, असेही शेख शकील यांनी सांगितले असून संबंधितांची सीबीआय व ई.डी.मार्फत त्वरीत चौकशी करण्यात यावी, अशी मागणीही या निवेदनातून करण्यात आली आहे. संबंधितांवर कुठलीही कारवाई न झाल्याने 9 रोजी शकील यांनी पत्नीसह जिल्हाधिकारी यांचे दालन गाठले व त्याठिकाणी आत्मदहनाचा प्रयत्न केला. दरम्यान जिल्हापेठ पोलिसांनी वेळेत दाखल होत दोघांना ताब्यत घेतल्याने अनर्थ टळला. दरम्यान, या घटनेची दिवसभर शहरात चर्चा होती..