सोनसाखळी, वाहने चोरणार्‍या चौघांना अटक
पिंपरी पोलिसांची कामगिरी; पाच लाखांचा मुद्देमाल जप्त
पिंपरी-चिंचवड : सोनसाखळी तसेच वाहन चोरी करणार्‍या चार सराईत आरोपींना पिंपरी पोलिसांनी अटक केली आहे. या आरोपींमध्ये ठाणे शहरातून मोक्का प्रकरणी फरार असलेला व पिंपरी येथून तडीपार असलेल्या एका महिला आरोपीचा समावेश आहे. या कारवाईत पिंपरी पोलिसांनी पाच लाखांचा मुद्देमाल जप्त केला आहे. काशीम उर्फ तल्लाफ मुक्तार इराणी (वय 20, रा. सदाशिवनगर, हडपसर), हुसैनी उर्फ गजणी मुक्तार इराणी (वय 19, रा. पाटीलनगर चाळ, ठाणे), मतीन अकबर कुरेशी (वय 23) व आशा मतीन कुरेशी (वय 24, दोघेही रा. मिलिंदनगर, पत्राशेड, चिंचवड) अशी अटकेतील आरोपींची नावे आहेत. यातील हुसैनी हा ठाणे शहरातून मोक्का कलमातील फरार आरोपी आहे. तर आशा कुरेशी ही चिंचवड परिसरातून तडीपार आहे. आशा कुरेशी हिच्यावर तडीपारीचा आदेश घोषित करुनही तिन्हे हद्दीत पुन्हा गुन्हा केल्याने तिच्यावर कलम 142 नुसार गुन्हा दाखल करण्यात आला आहे.
हा मुद्देमाल केला जप्त
या दोन्ही गुन्ह्यात पिंपरी पोलिसांनी एक सोनसाखळी चोरी, तीन वाहनचोरी, तीन घरफोडी चोरीचे असे एकूण सात गुन्हे उघडकीस आणले. आरोपींकडून सोनसाखळी चोरीमधील दीड तोळे वजनाचे सोन्याचे मंगळसूत्र, आठ तोळ्याचे घरफोडीतील दागिने, स्क्रू ड्रायव्हर, सायकल स्टॅन्ड, एक कटावणी, चार दुचाकी असा पाच लाख पाच हजार रुपयांचा मुद्देमाल पोलिसांनी जप्त केला आहे.
यांनी केली कारवाई
ही कारवाई पिंपरी पोलीस ठाण्याचे वरिष्ठ पोलीस निरीक्षक विवेक मुगळीकर, पोलीस निरीक्षक गुन्हे मसाजी काळे यांच्या मार्गदर्शनाखाली पोलीस उप निरीक्षक विठ्ठल बढे, सहायक पोलीस अरूण बुधकर, पोलीस हवालदार विवेकानंद सपकाळे, राजेंद्र भोसले, नागनाथ लकडे, शाकीर जिनेडी, पोलीस नाईक जावेद पठाण, महादेव जावळे, संतोष दिघे, दादा धस, पोलीस शिपाई शैलेश मगर, उमेश वानखडे, रोहीत पिंजकर, संतोष भालेराव, सुषमा पाटील यांनी केली.