सोन्याचे दर ३४ हजारापर्यंत जाणार

मुंबई-यंदाच्या दिवाळीत सोन्याचा भाव प्रतितोळा ३४ हजार रुपयांची कमाल पातळी गाठेल, अशी शक्यता वर्तवली जात आहे. डॉलरच्या तुलनेत रुपयाचे होत असलेले अवमूल्यन आणि आंतरराष्ट्रीय भू-राजकीय आव्हानांचा परिणाम यामुळे सोन्याच्या किंमती वाढू शकतात अशी शक्यता तज्ज्ञांनी वर्तवली आहे.

भारतीय बाजारात दिवाळीमध्ये सोन्याचे भाव ३० हजार ते ३४ हजार रुपये प्रतितोळा राहू शकतात. आंतरराष्ट्रीय स्तरावरील भू-राजकीय आव्हानांचा सोन्याच्या किंमतीवर परिणाम होत असतो . याशिवाय भारतीय रुपयाचे अवमूल्यन होत असून डॉलर दिवसेंदिवस बळकट होत आहे. रुपयाच्या या अवमूल्यनाचा थेट परिणाम सोन्याच्या किंमतीवर होत असून दिवाळीपर्यंत यात वाढ होण्याची शक्यता आहे. सोन्यात होणाऱ्या गुंतवणुकीत घट झाल्याचे दिसत आहे, कारण शेअर बाजारातून चांगला परतावा मिळतोय त्यामुळे सोन्याच्या किंमतीवर याचाही परिणाम होऊ शकतो.