सोलापूर विद्यापीठाला अहिल्याबाई होळकरांचे नाव
मुख्यमंत्री देवेंद्र फडणवीस यांची धनगर समाज मेळाव्यात घोषणा
नागपूर : आघाडी सरकारच्या चुकीमुळे धनगर आरक्षण रखडले. मात्र आम्ही नव्याने अहवाल तयार करुन केंद्राकडे पाठवणार आहोत. डिसेंबर 2017 मध्ये हा अहवाल येईल, अशी माहिती मुख्यमंत्री देवेंद्र फडणवीस यांनी नागपूर येथे आयोजित धनगर समाजाच्या मेळाव्यात बोलताना दिली. तसेच सोलापूर विद्यापीठाला पुण्यश्‍लोक अहिल्याबाई होळकर यांचे नाव देण्याची घोषणाही मुख्यमंत्र्यांनी या मेळाव्यात केली.
गोपीनाथ मुंडेंचा शब्द पूर्ण करणार
निवडणुकीअगोदर दिवंगत नेते गोपीनाथ मुंडे यांना धनगर समाजाबाबत भूमिका काय, असे विचारले होते. त्यांनी सांगितले धनगर समाज हा जन्मभर आपल्या पाठिशी उभा राहिलेला समाज आहे. त्यांना न्याय दिलाच पाहिजे. त्यामुळे प्रदेशाचा अध्यक्ष म्हणून सत्ता आल्यावर त्यांना आरक्षण देऊ, हे आश्‍वासन दिलेच पाहिजे. त्यामुळे हे आश्‍वासन पर्ण करु, अशी ग्वाही मुख्यमंत्र्यांनी या धनगर समाजाच्या मेळाव्यात दिली.
क्या हुआ तेरा वादा?
मुख्यमंत्री देवेंद्र फडणवीस नागपुरातील धनगर समाजाच्या मेळाव्यात भाषणासाठी उभे राहताच मंचावरच त्यांना आरक्षणाची आठवण गाण्यांतून करून देण्यात आली. त्यामुळे मुख्यमंत्र्यांची पंचाईत झाली. धनगर समाजातल्या काही कार्यकर्त्यांनी चक्क क्या हुआ तेरा वादा सारखी समर्पक गाणी वाजवली. या गाण्यांच्या दरम्यान एक-एक ओळीचा तपशील सुद्धा होता. ज्यातून मुख्यमंत्र्यांनी सत्तेत आल्यानंतर वेगवेगळ्या काळात दिलेल्या आश्‍वासनांची आठवण करुन देण्यात आली. आपण आरक्षणाचा शब्द विसरलो नसल्याचे स्पष्टीकरण मुख्यमंत्र्यांनी यावेळी दिले.
विद्यापीठ नामांतरावरून वाद सुरू
नागपुरात झालेल्या धनगर समाजाच्या मेळाव्यात मुख्यमंत्री देवेंद्र फडणवीस यांनी सोलापूर विद्यापीठाला अखेर पुण्यश्‍लोक अहिल्याबाई होळकर यांचे नाव देण्याची घोषणा केली. मात्र, या घोषणेनंतर सर्वत्र विविध पडसाद उमटू लागले. काही संघटनांनी आनंद व्यक्त केला तर काही संघटनांनी मुख्यमंत्र्यांचा निषेध केला आहे. अनेक दिवसांपासून सोलापूर विद्यापीठाच्या नामांतराचा वाद सुरु होता. विद्यापीठाला अहिल्याबाई होळकरांचे नाव द्यावे, असा एका समुहाचा आग्रह आहे. तर दुसर्‍या बाजूला विद्यापीठाला महात्मा बसवेश्‍वर यांचे नाव द्यावे, अशी मागणी आहे. दरम्यान, मुख्यमंत्र्यांनी अहिल्याबाई होळकरांचे नाव देण्याचा निर्णय घोषित केल्याने त्याचे पडसाद उमटू लागले आहेत.