सौरऊर्जा वीज खरेदीला मिळाला न्यूनतम दर

चालू वर्षातील सर्वात कमी दर

पिंपरी : महावितरण कंपनीने 1 हजार मेगावॅट सौरऊर्जेसाठी काढलेल्या निविदेला सर्वात कमी प्रतियुनिट दर 2 रुपये 71 पैसे मिळाला आहे. या वर्षात मे. एनटीपीसीने व देशातील इतर राज्यांनी काढलेल्या निविदांमध्ये न्युनतम दर ठरला आहे. त्यामुळे सौरऊर्जेमधील निविदाकारांनी महाराष्ट्र शासन व महावितरणवर विश्‍वास दाखविल्याबद्दल महावितरण व्यवस्थापनाने समाधान व्यक्त केले आहे.

महाराष्ट्र विद्युत नियामक आयोगाने ठरवून दिलेल्या अपारंपारिक ऊर्जा खरेदी बंधनाची पूर्तता करण्यासाठी 1 हजार मे.वॅ. सौरऊर्जा दीर्घकालीन निविदाद्वारे खरेदी करण्यासाठी सदर निविदा प्रकियेला सुरूवात करण्यात आली होती. यात आठ निविदाकारांनी सहभाग नोंदविला होता आणि त्यांची एकूण क्षमता सुमारे 1,450 मे.वॅ. इतकी होती. त्यापैकी 1 हजार मेगावॅटसाठी खालील निविदाकार पात्र ठरले. यामध्ये मे. जेएलटीएम एनर्जी (20 मे.वॅ.) व मे. माहोबा सोलार प्रा.लि.,(200 मे.वॅ.) हे सर्वात कमी बोली लावलेले निविदाकार ठरले असून त्यांनी 2 रुपये 71 पैसे प्रतियुनिट इतक्या कमी दराची बोली लावली.

मे. रिन्यु सोलार पॉवर प्रा.लि.,(250मे.वॅ.) मे. एक्मे सोलार होल्डिंग्स लि.,(250 मे.वॅ.) मे. टाटा पॉवर रिन्युयबल एनर्जी लि.,(150 मे.वॅ.) आणि मे. अजुरे पॉवर (इंडिया) प्रा. लि., (150 मे.वॅ.) यांनी 2 रुपये 72 पैसे प्रतियुनिट इतकी बोली लावली होती. या प्रकियेत प्राप्त झालेला न्युनतम दर हा या वर्षात मे. एनटीपीसीने व देशातील इतर राज्यांनी काढलेल्या निविदांमध्ये न्युनतम दर ठरला आहे. सौरऊर्जेमधील निविदाकारांनी महाराष्ट्र शासन व महावितरणवर विश्‍वास दाखविला याबद्दल महावितरण व्यवस्थापनाने समाधान व्यक्त केले आहे. या प्रकल्पातून उपलब्ध होणार्‍या सौरऊर्जेमुळे महावितरणला महाराष्ट्र शासनाच्या धोरणानुसार शेतकर्‍यांना दिवसा वीज उपलब्ध करून देण्यासाठी तसेच अपारंपारिक ऊर्जा खरेदीच्या बंधनाची पूर्तता करण्यासाठी मदत होणार आहे.