स्थायी सभापतींनी सदस्यांमध्ये गोंधळ निर्माण करून विषय मंजूर केल्याचा आरोप

पिंपरी चिंचवड : भागवत धर्माचा प्रसार व प्रचार व्हावा, वारकरी संप्रदायाचे पारंपरिक शिक्षण मिळावे, याकरिता टाळगाव चिखली परिसरात पहिले ‘जगद्गुरू संत तुकाराम महाराज संतपीठ’ उभारण्यात येत आहे. त्यासाठी महापालिकेने 40 कोटी रूपयांचा खर्च गृहीत धरला असताना, कंत्राटदारांनी जादा दराच्या निविदा भरल्या असून शुक्रवारी झालेल्या स्थायीच्या सभेत राष्ट्रवादीच्या सदस्यांना अंधारात ठेवून विषय मंजुर करण्यात आला. स्थायी सभापतींनी विरोधीसह पक्षाच्या सदस्यांमध्ये गोंधळ निर्माण करून विषय मंजूर केल्याचा आरोप राष्ट्रवादीचे नगरसेवक करीत आहेत. तर, संतपीठाचा विषय मंजूर झाल्याचे नगरसचिवाकडून सांगण्यात येत आहे. विरोधी नगरसेवकांना अंधारात ठेवून हा विषय मंजूर केल्याने राष्ट्रवादी काँग्रेसने आंदोलनाचा पवित्रा घेतला आहे.

पिंपरी चिंचवड महापालिकेच्या स्थायी समितीची सभा शुक्रवारी (दि.21) रोजी मधुकर पवळे सभागृहात पार पडली. या सभेच्या अध्यक्षस्थानी ममता गायकवाड होत्या.  प्रभाग क्रमांक 1 मधील या संतपीठ उभारणीस 13 मे 2015 रोजी महापालिका सभेत मान्यता देण्यात आली. त्यानंतर माध्यमिक शाळेसाठी आरक्षित चिखली येथील 1 हेक्टर 80 गुंठे जागा महापालिकेला देण्यास राज्य सरकारने मान्यता दिली. या संतपीठामध्ये निवासी स्वरुपाचे, प्राथमिक शाळेपासून ते उच्च पदवीपर्यंतचे केवळ संत साहित्यावर आधारित शिक्षण दिले जाणार आहे. शाळेमध्ये सर्वधर्मीय विद्यार्थ्यांना प्रवेश असून, हे संतपीठ मराठी माध्यमातून शिक्षण देणारे असणार आहे. महापालिकेतर्फे उभारण्यात येणारे हे संतपीठ आणि त्या अनुषंगाने शाळा व्यवस्थापनासाठी कंपनी स्थापन करण्यात येणार आहे.

संतपीठाच्या इमारत बांधकामासाठी महापालिकेतर्फे 40 कोटी 61 लाख रुपयांची निविदा मागविण्यात आली. बी. के. खोसे यांनी 11.16 टक्के जादा, व्ही. एम. मातेरे इन्फ्रास्ट्रक्चर प्रायव्हेट लिमिटेड यांनी 14.70 टक्के जादा, तर एस. एस. साठे यांनी 16 टक्के जादा दराने निविदा सादर केल्या. बी. के. खोसे यांनी सादर केलेली वाढीव दराची निविदा स्वीकारण्याचा निर्णय आयुक्त श्रावण हर्डीकर यांनी घेतला आहे. त्यानुसार म्हणजेच 44 कोटी 61 लाख 73 हजार 323 रुपये अधिक रॉयल्टी चार्जेस 36 लाख 92 हजार 264 आणि मटेरिअल चार्जेस 10 लाख 31 हजार 477 रुपये असे एकूण 45 कोटी 8 लाख 97 हजार 64 रुपये इतका खर्च संतपीठ उभारणीसाठी येणार आहे. दरम्यान, संतपीठाचा विषय राष्ट्रवादीच्या नगरसेवकांना अंधारात ठेवुन मंजूर केला आहे. संतापलेल्या राष्ट्रवादीच्या सदस्यांनी संतपीठावरुन आंदोलन करणार असल्याचा पावित्रा घेतला आहे.