स्थायी सभा 2 मिनीटांत गुंढाळली

धुळे । महापालिकेत गुरूवारी स्थायी समितीच्या सभा औपचारिकतेचा कित्ता गिरवला. अवघ्या दोन मिनिटांत विषयपत्रिकेवर असलेले सर्व विषय मंजूर करीत सभेची औपचारिकता पूर्ण करण्यात आली. विशेष म्हणजे केवळ दोन सदस्यांनी सभेची अधिकृत रजा घेतलेली असतांना तब्बल 10 सदस्य सभेला अनुपस्थित होते. महापालिकेचा आर्थिक कणा असलेल्या स्थायी समितीची सलग दुसरी औपचारिक सभा गुरूवारी पार पडली.

विषय वाचनास 11 वा. 27 मिनीटांनी सुरूवात
या सभेला सभापती कैलास चौधरी, उपायुक्त रविंद्र जाधव, नगरसचिव मनोज वाघ यांच्यासह सदस्य दिपक शेलार, कमलेश देवरे, नाना मोरे, मायादेवी परदेशी, वालिबेन मंडोरे हे सदस्य उपस्थित होते. सभापती कैलास चौधरी यांचे 11 वाजून 23 मिनिटांनी सभागृहात आगमन झाले. त्यानंतर वंदे मातरम् राष्ट्रवंदना झाली. विषय वाचनास 11 वाजून 27 मिनिटांनी सुरूवात झाली तर 11 वाजून 29 मिनिटांपर्यंत अर्थात अवघ्या दोन मिनिटात सर्व विषय मंजूर करण्यात आले.

विषयपत्रींकेवरील 9 विषय मंजूर
स्थायी समितीची सभा महापालिकेचे आर्थिक धोरण ठरविणारी समिती असतांना विषयपत्रिकेंवरील सर्व विषय मंजूर करून सत्ताधार्‍यांनी एकाधिकारशाही गाजवली आहे. यातच दोन सदस्यांनी अधिकृतपणे रजा घेतलेली असतांना 8 सदस्य गैरहजर राहिले आहेत. यातून त्यांना शहराच्या विकासाशी काहीएक देणेघेणे नसल्याचे यातून दिसून येत आहे. यासभेत 9 विषय चर्चा न करात केवळ दोन मिनीटांत मंजूरी देण्यात आली.

लाखोंचे विषय मंजूर
नगरसचिव मनोज वाघ यांनी विषय पत्रिकेवरील विषयांचे वाचन करताच सभापती कैलास चौधरी यांनी ‘मंजूर’ म्हणत लाखोंचे विषय मंजूर केले. एकाही सदस्याने या सभेत मत प्रदर्शन केले नाही. हजराबी महंमद शेख व जैबुन्नीसा अशरफ खाँ पठाण या दोन नगरसेविकांचे रजेचे अर्ज होते. तर आठ नगरसेवकांनी सभेला दांडी मारली. विद्युत विभागाने निर्गमित केलेले विविध कार्यादेश अवलोकनार्थ, उपायुक्त कवठळकर यांची रजा मान्यता, तापी जलवाहिनीला लागलेल्या गळत्यांच्या दुरूस्तीबाबत कार्योत्तर मंजूरी व जिल्हास्तरीय नगरोत्थान योजनेंतर्गत गटार कामांच्या निविदांची दरमंजूरी असे एकूण 9 विषय सभेत मंजूर करण्यात आले. सलग दुसर्‍यांदा सभा गुडाळण्यात आल्याने पदाधिकारी सामान्यांच्या प्रश्‍नाबाबत किती गंभीर असल्याचे दिसून येते.