‘स्मार्ट सिटी’साठी मगरपट्टा सिटीतील कामे पथदर्शी : खा. अनिल शिरोळे

हडपसर । शहरासाठी केंद्र सरकारच्या प्रस्तावित स्मार्ट सिटी प्रकल्पांतर्गत बाणेर-बालेवाडी भागात प्राथमिक कामास सुरुवात करण्यात आली आहे. शहरातील मगरपट्टा सिटी या प्रकल्पात सुनियोजित पद्धतीने नागरी सुविधांच्या कामाचे नियोजन करण्यात आले आहे. स्मार्टसिटीची उभारणी करण्यामध्ये मगरपट्टा सिटीतील कामे पथदर्शी, मार्गदर्शनपर ठरतील असे मत खासदार अनिल शिरोळे यांनी व्यक्त केले.

मगरपट्टा सिटीतील बारकावे जाणून घेण्यासाठी खासदार अनिल शिरोळे यांनी आमदार मेधा कुलकर्णी, नगरसेवक ज्योती कळमकर, स्वप्नाली सायकर, अमोल बालवडकर, सिद्धार्थ शिरोळे, महापालिका अधिकारी राजेंद्र राऊत, विशाल हरिभक्त, अभय शिंदे, संतोष कदम ह्यांच्या समवेत मगरपट्टा सिटीला भेट देऊन तेथील कामांची प्रत्यक्ष पाहणी केली.याप्रसंगी क्रेडाईचे अध्यक्ष सतीश मगर यांनी मगरपट्टा सिटीमधील अंतर्गत रस्ते, पदपथ, गॅस लाइन, मल निस्सारण व्यवस्थापन आदी नागरी सुविधांवर एका पॉवर पॉइंट प्रेझेंटेशनद्वारे उपस्थितांना मार्गदर्शन केले.