स्मृती इराणींचा राजीनाम्याची राष्ट्रवादी कॉंग्रेसची मागणी

पुणे : रक्ताने माखलेले सॅनिटरी नॅपकिन घेऊन तुम्ही मित्राच्या घरात जाऊ शकता का ? मग त्याच अवस्थेत तुम्ही मंदिरात कशा प्रवेश करू शकाल असा प्रश्न केंद्रीय मंत्री स्मृती इराणी यांनी एका कार्यक्रमात केला होता. त्यावर आता राजकीय क्षेत्रातून तीव्र प्रतिक्रीया येत असून राष्ट्रवादी कॉंग्रेसकडून आज पुण्यात आंदोलन करत स्मती इराणींच्या राजीनाम्याची मागणी करण्यात आली. राष्ट्रवादी कॉंग्रेसच्या वतीने आज पुण्यातील तांबडी जोगेश्वरी मंदिराबाहेर आंदोलन करुन इराणी यांच्या विधानाचा निषेध करण्यात आला.

यावेळी बोलताना राष्ट्रवादी काँग्रेसचे पुणे शहराध्यक्ष चेतन तुपे म्हणाले, स्मृती इराणी यांनी केलेले विधान म्हणजे स्त्रीत्वाचा आणि मात्रत्वाचा अपमान आहे. निसर्गाने स्त्रियांना दिलेल्या देणगीचा असा अपमान करणे त्यांना शोभत नाही. त्यांच्या या विधानामुळे स्त्रिवर्गात असंतुष्टता निर्माण झाली आहे. स्मृती इराणी यांच्या वक्तव्यातून भाजपची मनुवादी मानसिकता दिसून येतेय. भाजपची स्त्रियांना कमी लेखण्याची मानसिकता या विधानातून स्पष्ट होत आहे. त्यामुळे स्मृती इराणी यांनी तात्काळ राजीनामा द्यावा अशी मागणी यावेळी करण्यात आली. एका बाजूला पंतप्रधान नरेंद्र मोदी ‘बेटी बचाव बेटी पढाव’ चा नारा देत आहेत तर दुसऱ्या बाजूला त्यांचेच मंत्री मातृत्वाचा अपमान करणारे विधान करत आहेत. त्यामुळे भाजपने स्मृती इरानींचा राजीनामा घेतलाच पाहिजे, अन्यथा आगामी काळात तीव्र स्वरूपाचे आंदोलन छेडले जाईल असा इशारा यावेळी देण्यात आला.