स्वच्छतेचा प्रश्‍नी आमदार मंदा म्हात्रेंनी घेतली पालिका आयुक्तांची भेट
नवी मुंबईतील विविध नागरी समस्यांबाबत केली चर्चा, विकासात्मक सुविधांकरिता ते त्यांच्या आमदार निधीची तरतूद
नेरुळ । नवी मुंबईतील स्वच्छतेचा प्रश्न ऐरणीवर आला असताना अनेक गावागावात घाणीचे साम्राज्य पसरले असून अनेक ठिकाणी गटाराची झाकणेही नसल्याचे निदर्शनास येत आहे. तसेच नवी मुंबईतील नागरिकांना त्यांच्या प्रभागातील विविध नागरी समस्या भेडसावत असल्याच्या तक्रारी तेथील नागरिकांनी व लोकप्रतिनिधींनी आमदार मंदा म्हात्रे यांजकडे केल्या होत्या. याच अनुषंगाने आज बेलापूरच्या आमदार म्हात्रे यांनी नवी मुंबई महानगरपालिका आयुक्त डॉ. रामास्वामी एन.यांची भेट घेतली.
आमदार निधीची तरतूद
स्वच्छतागृहे, समाज मंदिर, अनेक प्रभागात सी.सी.टी.व्ही. कॅमेरे व महापालिका शाळांमध्ये सॅनेटरी नॅपकीन वेंडिंग मशीन व डीस्पोजल मशीन यांकरिता आमदार निधीची मागणी करण्यात आली.
नागरिकांना भेडसावणार्‍या समस्यांवर झाली चर्चा
नवी मुंबईतील गावांगावात पसरलेले घाणीचे साम्राज्य, नागरिकांच्या आरोग्याचा प्रश्न, बेलापूर, नेरूळ व ऐरोली येथील हॉस्पिटल, तुर्भे डम्पिंग ग्राउंड, मंदिरांवरील कारवाई थांबविणे, नवी मुंबईतील तलावांमधील गाळ काढून तलावांची स्वच्छता करणे, विविध प्रभागातील मलनिस्सारण वाहिनी टाकणे, उघड्यावर असलेले विद्युत वाहिन्या भूमिगत करणे, पालिकेच्या बहुउद्देशीय इमारतींमध्ये आरोग्य केंद्र, समाज मंदिर, महिलांकरिता बचतगट भवन, व्यायामशाळा, वाचनालय यांसारख्या नागरी सुविधा सुरु करणे तसेच उद्यान विभागामार्फत निघालेल्या निविदा रद्द करून स्थानिक प्रकल्पग्रस्त ठेकेदारांना निविदेत सामवून घेणे अशा विविध समस्यांविषयी चर्चा करण्यात आली.
गेल्या १५ दिवसात मी गणपती उत्सवाच्या निमित्ताने अनेक ठिकाणी दौरा केला असता गावागावात मला घाणीचे साम्राज्य पाहायला मिळाले. तेथील नागरिकांच्या आरोग्याचा प्रश्नही गंभीर बनत चालला आहे. तसेच अनेक प्रभागातील नागरिकांनी तेथील लोकप्रतिनिधींनी त्यांच्या प्रभागातील अनेक समस्यांबाबत मला निवेदन केले होते. याच अनुषंगाने आज आयुक्तांबरोबर भेट घेतली. – मंदा म्हात्रे, आमदार बेलापूर विधानसभा नवी मुंबई
आमदार मंदा म्हात्रे यांच्याबरोबर झालेली बैठक ही नियोजित बैठक होती. त्यांनी त्यांच्या मतदारसंघात असलेल्या समस्यांविषयी चर्चा केली असून त्यांच्या संपूर्ण स्थितीचा आढावा घेऊन मागण्या पूर्ण करण्यात येतील असे सांगितले. काही विकासात्मक सुविधांकरिता ते त्यांच्या आमदार निधीची तरतूद करणार असून महापालिकाही याबाबत सकारात्मक आहे. – डॉ. एन रामस्वामी, पालिका आयुक्त